NEET पेपर फूटी प्रकरणी CBI कडून RCC चे संचालक मोटेगावकर यांची चौकशी

एका पालकाने मंगळवारी पोलिस अधीक्षक कार्यालयात दिलेल्या तक्रारीनंतर या प्रकरणाला गती मिळाली. संबंधित तक्रारीत लातूरमधील एका खासगी कोचिंग क्लासमध्ये घेण्यात आलेल्या मॉक टेस्टमधील 42 प्रश्न हे NEET परीक्षेतील प्रश्नांशी तंतोतंत जुळत असल्याचा आरोप करण्यात आला होता.

May 16, 2026 - 13:02 Updated: May 16, 2026 - 13:03

NEET पेपर फूटी प्रकरणी CBI कडून RCC चे संचालक मोटेगावकर यांची चौकशी

एज्युवार्ता न्यूज नेटवर्क

मेडिकल प्रवेशाच्या प्रवेशासाठी घेतल्या जाणाऱ्या NEET (UG) 2026 पेपरफुटी प्रकरणाच्या तपासाला वेग आला असून Central Bureau of Investigation अर्थात CBIने शुक्रवारी लातूर येथे रेनुकाई केमिस्ट्री क्लासेस (RCC) चे संचालक शिवराज मोटेगावकर यांची त्यांच्या निवासस्थानी चौकशी करण्यात आली.त्यामुळे नाशिक, पुणे, लातूर आदी शहरात नीट पेपर फूटीचे धागेदोरे पसरले असल्याचे स्पष्ट होत आहे.

वैद्यकीय पदवी अभ्यासक्रमांच्या प्रवेशासाठी 3 मे रोजी घेण्यात आलेली NEET (UG) 2026 परीक्षा पेपरफुटीच्या आरोपांमुळे 12 मे रोजी रद्द करण्यात आली होती. त्यानंतर केंद्र सरकारने या प्रकरणाचा तपास CBIकडे सोपविला. CBIचे पथक बुधवारी उशिरा रात्री लातूरमध्ये दाखल झाले होते. गुरुवारी त्यांनी निवृत्त रसायनशास्त्र प्राध्यापक पी. व्ही. कुलकर्णी यांना चौकशीसाठी ताब्यात घेतले. कुलकर्णी हे लातूरचे रहिवासी असून चार वर्षांपूर्वी एका नामांकित महाविद्यालयातून निवृत्त झाले आहेत. ते NEET प्रश्नपत्रिका तयार करणाऱ्या समितीचे सदस्य असल्याची माहिती समोर आली असून त्यांनी रसायनशास्त्राचा पेपर तयार केल्याचेही सांगितले जात आहे.

एका पालकाने मंगळवारी पोलिस अधीक्षक कार्यालयात दिलेल्या तक्रारीनंतर या प्रकरणाला गती मिळाली. संबंधित तक्रारीत लातूरमधील एका खासगी कोचिंग क्लासमध्ये घेण्यात आलेल्या मॉक टेस्टमधील 42 प्रश्न हे NEET परीक्षेतील प्रश्नांशी तंतोतंत जुळत असल्याचा आरोप करण्यात आला होता.

या तक्रारीची दखल घेत पोलिस अधीक्षक अमोल तांबे यांनी उपविभागीय पोलिस अधिकारी समीरसिंह साळवे यांना चौकशीचे आदेश दिले. पोलिसांनी या संदर्भात कोचिंग क्लासचे कर्मचारी, विद्यार्थी आणि समुपदेशकांसह सहा जणांची चौकशी केली. तसेच दोन कोचिंग संस्थांचे CCTV फुटेजही जप्त करण्यात आले आहे.

लातूरमध्ये दाखल झालेल्या CBI पथकात सुमारे 28 अधिकाऱ्यांचा समावेश आहे. गुरुवारी रात्री CBI अधिकाऱ्यांनी शिवनगर परिसरातील ओंकार रेसिडेन्सी येथील मोटेगावकर यांच्या निवासस्थानी भेट दिली होती. शुक्रवारी सकाळी पुन्हा चौकशीसाठी पथक तेथे पोहोचले. दुपारी सुमारे 12.30 वाजता अधिकारी तेथून निघून गेले. अधिकारी बाहेर पडत असताना माध्यम प्रतिनिधींनी त्यांच्याशी संवाद साधण्याचा प्रयत्न केला. मात्र, अधिकाऱ्यांनी कोणतीही प्रतिक्रिया दिली नाही.