मोठी बातमी:नौरोसजी वाडिया कॉलेजमध्ये मुलींना बीएस्सी प्रथम वर्ष अभ्यासक्रमास मोफत प्रवेश
राज्य शासनाने व्यावसायिक अभ्यासक्रमासाठी मुलींना मोफत शिक्षणाचा निर्णय घेतला आहे. मात्र, वाडिया कॉलेजने (बी.एस्सी.) प्रथम वर्ष अभ्यासक्रमासाठी मोफत प्रवेशाचा निर्णय घेऊन गरजू मुलींना मोठा दिलासा दिला आहे.
eduvarta@gmail.com 
एज्युवार्ता न्यूज नेटवर्क
पुण्यातील नामांकित मॉडर्न एज्युकेशन सोसायटीच्या नौरोसजी वाडिया महाविद्यालयाने मुलींना बीएस्सी प्रथम वर्ष अभ्यासक्रमासाठी मोफत प्रवेश देण्याचा निर्णय घेतला आहे. आर्थिक परिस्थिती किंवा कौटुंबिक जबाबदाऱ्यांमुळे कोणत्याही होतकरू मुलीचे उच्च शिक्षणाचे स्वप्न अपूर्ण राहू नये, या उद्देशाने संस्थेतर्फे हा ऐतिहासिक व महत्त्वपूर्ण निर्णय घेण्यात आला आहे. शैक्षणिक वर्ष २०२६-२७ पासून विज्ञान शाखेच्या पदवी (बी.एस्सी.) प्रथम वर्ष अभ्यासक्रमासाठी मुलींना नौरोसजी वाडिया महाविद्यालयात पूर्णपणे मोफत प्रवेश देण्यात येणार आहे,असे मॉडर्न एज्युकेशन सोसायटीचे विश्वस्त प्रा.सचिन सानप यांनी सांगितले.
इयत्ता बारावी उत्तीर्ण होऊन बी.एस्सी. प्रथम वर्षात प्रवेश घेणाऱ्या सर्व विद्यार्थिनींना या योजनेचा लाभ मिळणार आहे. मुलींच्या उच्च शिक्षणाला चालना देणे, त्यांना आत्मनिर्भर बनविणे आणि आर्थिक अडचणींमुळे शिक्षणात खंड पडू न देणे, हा या निर्णयामागील प्रमुख उद्देश आहे.राज्य शासनाने व्यावसायिक अभ्यासक्रमासाठी मुलींना मोफत शिक्षणाचा निर्णय घेतला आहे. मात्र, वाडिया कॉलेजने (बी.एस्सी.) प्रथम वर्ष अभ्यासक्रमासाठी मोफत प्रवेशाचा निर्णय घेऊन मुलींना मोठा दिलासा दिला आहे.
मॉडर्न एज्युकेशन सोसायटीचे विश्वस्त प्रा. सचिन सानप म्हणाले, "संस्थेच्या ध्येय धोरणानुसार मुलींचे हित आणि त्यांचे उज्ज्वल भविष्य लक्षात घेऊन हा निर्णय घेण्यात आला आहे. वाडिया महाविद्यालयातून पदवी शिक्षण पूर्ण केलेल्या विद्यार्थिनी भविष्यात देशाच्या विकासात मोलाचे योगदान देणाऱ्या संशोधक, सर्जनशील आणि कुशल महिला वैज्ञानिक म्हणून घडाव्यात, हीच आमची भूमिका आहे."
आत्मनिर्भरता आणि स्वयंपूर्णतेचा विचार समोर ठेवून मुलींसाठी मोफत शिक्षणाची ही सुवर्णसंधी उपलब्ध करून देण्यात आली आहे,असे नमूद करून महाविद्यालयाचे प्राचार्य डॉ. बी. बी. बहुले म्हणाले, पात्र विद्यार्थिनींनी या योजनेचा लाभ घेण्यासाठी लवकरात लवकर प्रवेश प्रक्रिया पूर्ण करावी.
या योजनेअंतर्गत बी.एस्सी. प्रथम वर्षातील गणित, भौतिकशास्त्र, रसायनशास्त्र, वनस्पतीशास्त्र, प्राणिशास्त्र, भूगोल, भूगर्भशास्त्र आणि इलेक्ट्रॉनिक्ससह नौरोसजी वाडिया महाविद्यालयातील विज्ञान शाखेतील सर्व विषयांचा समावेश करण्यात आला आहे. त्यामुळे विज्ञान शाखेत उच्च शिक्षण घेऊ इच्छिणाऱ्या विद्यार्थिनींसाठी ही योजना दिलासादायक ठरणार असल्याचे मानले जात आहे.
