दुर्गम भागातील विद्यार्थ्यांची पायपीट थांबणार; STच्या ताफ्यात १०० पुण्यश्लोक अहिल्यादेवी मिनी बस येणार
राज्यातील दुर्गम, डोंगराळ आणि अरुंद रस्त्यांवरील आदिवासी बांधव, ग्रामीण जनता तसेच विद्यार्थ्यांच्या प्रवासाला नवी दिशा देण्यासाठी महाराष्ट्र राज्य मार्ग परिवहन महामंडळाच्या ताफ्यात एक महत्त्वपूर्ण भर पडणार आहे.
Eduvarta
एज्युवार्ता न्यूज नेटवर्क
राज्यातील दुर्गम, डोंगराळ आणि अरुंद रस्त्यांवरील आदिवासी बांधव, ग्रामीण जनता तसेच विद्यार्थ्यांच्या प्रवासाला नवी दिशा देण्यासाठी महाराष्ट्र राज्य मार्ग परिवहन महामंडळाच्या ताफ्यात एक महत्त्वपूर्ण भर पडणार आहे. परिवहनमंत्री तथा एसटी महामंडळाचे अध्यक्ष प्रताप सरनाईक यांनी जाहीर केले की, १०० ‘पुण्यश्लोक अहिल्यादेवी’ मिडी बस या भागात धावणार आहेत. या निर्णयामुळे आजही शिक्षण, रोजगार, आरोग्य आणि दैनंदिन गरजांसाठी किलोमीटरची पायपीट करणाऱ्या नागरिकांना लालपरीची साथ मिळणार आहे. ‘वस्ती तेथे एसटी!’ हे केवळ घोषवाक्य नसून महाराष्ट्राच्या शेवटच्या टोकापर्यंत सार्वजनिक वाहतुकीची जीवनवाहिनी पोहोचविण्याचा निर्धार असल्याचे मंत्री सरनाईक यांनी स्पष्ट केले.
डोंगर-दऱ्या, तीव्र चढ-उतार, अरुंद रस्ते आणि नागमोडी वळणांमुळे अनेक ठिकाणी मोठ्या बस पोहोचणे शक्य होत नाही. परिणामी आदिवासी नागरिक आणि विशेषतः शाळा-महाविद्यालयीन विद्यार्थ्यांना दररोज दहा ते पंधरा किलोमीटरपर्यंतची पायपीट करावी लागते. विद्यार्थ्यांच्या शिक्षणाच्या वाटेत अडथळे निर्माण होऊ नयेत आणि दुर्गम भागातील नागरिकांना सुरक्षित व विश्वासार्ह सार्वजनिक वाहतूक उपलब्ध व्हावी, यासाठी अठ्ठावीस आसनी मिनी बस चालविण्याचा निर्णय घेण्यात आला आहे. या बस दुर्गम पायवाटेवरूनही एसटीची वाट निर्माण करतील, असे मंत्र्यांनी सांगितले.
या मार्गावरील बससेवा आर्थिकदृष्ट्या व्यवहार्य ठरणार नसली, तरी नफा-तोट्याच्या गणितापेक्षा आदिवासी बांधव आणि विद्यार्थ्यांची पायपीट थांबविणे अधिक महत्त्वाचे असल्याची स्पष्ट भूमिका मंत्री सरनाईक यांनी मांडली. त्यांच्या मते, सार्वजनिक वाहतुकीचे उद्दिष्ट केवळ उत्पन्न मिळविणे नसून समाजकल्याण साधणे हे आहे. या निर्णयामुळे दुर्गम भागातील नागरिकांच्या जीवनात सकारात्मक बदल घडून येईल आणि शिक्षणाच्या संधी अधिक सुलभ होतील.
एसटी महामंडळाच्या या उपक्रमामुळे राज्यातील शेवटच्या वाडी-वस्तीपर्यंत लालपरी पोहोचेल आणि विद्यार्थ्यांसह सर्व नागरिकांना प्रवासाची सोय उपलब्ध होईल. पुण्यश्लोक अहिल्यादेवी यांच्या नावाने ओळखल्या जाणाऱ्या या मिडी बस दुर्गम भागातील विकासाला गती देतील, अशी अपेक्षा व्यक्त केली जात आहे. हा निर्णय आदिवासी आणि ग्रामीण जनतेसाठी ऐतिहासिक ठरणार आहे.
