पुणे शिक्षक,पदवीधरच्या जागांसाठी भाजप दोन दिवसांत उमेदवार देणार? : मंत्री चंद्रकांत पाटील
विद्येचे माहेरघर म्हणून ओळखल्या जाणाऱ्या पुण्यात शालेय व उच्च शिक्षण क्षेत्राशी निगडीत सर्व महत्त्वाची शासकीय कार्यालये आहेत.मात्र,अनेक वर्षांपासून पुणे जिल्ह्याला स्वत:चा शिक्षक आमदार मिळाला नाही.पुणे जिल्ह्याचा आमदार असेल तर तो येथे सर्वांसाठी उपलब्ध असेल.त्यामुळे पुण्यातील उमेदवाराच्या झोळीत मतदार मतांचे दान टाकणार हे पाहणे उत्सुकतेचे ठरणार आहे.
Eduvarta
एज्युवार्ता न्यूज नेटवर्क
केंद्रीय निवडणूक आयोगाकडून शिक्षक व पदवीधर निवडणुकीचा कार्यक्रम जाहीर करण्यात आल्यानंतर निवडणूक प्रक्रियेला चांगलाच वेग आला आहे. राजकीय पक्षांनी आपले उमेदवार निवडणुकीच्या रिंगणात उतरवण्यासाठी जोरदार हालचाली सुरू केल्या आहेत. त्यात भारतीय जनता पक्षाचे ज्येष्ठ नेते व उच्च व तंत्र शिक्षण मंत्री चंद्रकांत पाटील यांनी पुणे शिक्षक व पदवीधरच्या जागांवर भाजपचा दावा असल्याचे स्पष्ट केले आहेत. तसेच येत्या दोन दिवसात उमेदवार जाहीर केले जातील, असेही स्पष्ट केले आहे. त्यामुळे शिवसेना व राष्ट्रवादी काँग्रेस पक्षाच्या इच्छुक उमेदवारांचे काय होणार असा प्रश्न निर्माण झाला आहे?
भारतीय जनता पक्षाचा हा पारंपरिक मतदार संघ असला तरी मुख्यमंत्री देवेंद्र फडणवीस व उपमुख्यमंत्री एकनाथ शिंदे आणि उपमुख्यमंत्री सुनेत्राताई पवार यांच्यात याबाबत चर्चा झाल्यानंतरच अंतिम निर्णय होईल,असे चंद्रकांत पाटील यांनी माध्यमांशी बोलताना सांगितले. त्यामुळे अधिकृत उमेदवारी कोणाला मिळणार हे अजूनही गुलदस्त्यात आहेत. तसेच शिवसेना शिंदे गट आणि राष्ट्रवादी अजित पवार गट यांना जागा मिळाली नाही तर हे दोन्ही पक्ष मैत्रीपूर्ण लढण्याचा निर्णय घेणार का? याकडेही सर्वांचे लक्ष लागले आहे.
पुणे पदवीधर व शिक्षक या दोन्ही जागा यापूर्वी भारतीय जनता पक्षाच्या उमेदवारांनी लढविल्या आहेत. स्वतः चंद्रकांत पाटील पुणे पदवीधर मधून यापूर्वी निवडून आले आहेत. त्यामुळे पुणे पदवीधर व शिक्षक हा भारतीय जनता पक्षाचा पारंपरिक मतदारसंघ मानला जातो. मात्र राजकीय गणिते बदलल्यामुळे शिवसेना शिंदे गट आणि राष्ट्रवादी काँग्रेस अजित पवार गट यांनीही या मतदारसंघातून आपले उमेदवार उभे करण्याबाबत आग्रह धरला आहे.
पुणे शिक्षक मतदार संघातून विद्यमान आमदार जयंत आसगावकर यांना पुन्हा एकदा आपल्याला महाविकास आघाडी कडून निवडणूक लढवण्याची संधी मिळेल अशी अपेक्षा आहे. तर 'शिक्षकांचा आमदार शिक्षकच हवा'' अशी भूमिका घेऊन मॉडर्न एज्युकेशन सोसायटीचे विश्वस्त व प्राध्यापक सचिन सानप निवडणुकीच्या रिंगणात उतरले आहेत. पुण्यातून शिक्षक संघटनेचे पदाधिकारी नंदकुमार सागर हे सुद्धा इच्छुक आहेत. पुण्यातून सध्या दोन उमेदवार इच्छुक असले तरी त्यात वाढ होण्याची शक्यता आहे. विद्येचे माहेरघर म्हणून ओळखल्या जाणाऱ्या पुण्यात शालेय व उच्च शिक्षण क्षेत्राशी निगडीत सर्व महत्त्वाची शासकीय कार्यालये आहेत.मात्र,अनेक वर्षांपासून पुणे जिल्ह्याला स्वत:चा शिक्षक आमदार मिळाला नाही.पुणे जिल्ह्याचा आमदार असेल तर तो येथे सर्वांसाठी उपलब्ध असेल.त्यामुळे पुण्यातील उमेदवाराच्या झोळीत मतदार मतांचे दान टाकणार हे पाहणे उत्सुकतेचे ठरणार आहे.
सोलापूर जिल्ह्यातून माजी आमदार दत्तात्रय सावंत यांच्यासह प्राध्यापक बी. पी. रोंगे, तसेच आरोग्य दूत म्हणून ओळखले जाणारे मंगेश चिवटे शिक्षक मतदार संघातून निवडून लढण्यास इच्छुक आहेत.तिन्ही उमेदवार सोलापूरचे असल्याने येथे मतांचे मोठ्या प्रमाणावर विभाजन होणार आहे.त्यामुळे येथील उमेदवारांना निवडून येण्यासाठी इतर जिल्ह्यातील मतदारांवर अधिक अवलंबून राहावे लागणार आहे.
कोल्हापूर जिल्ह्यातून स्वामी विवेकानंद संस्थेचे कौस्तुभ गावडे निवडणूक लढण्यास इच्छुक आहेत. तर कोल्हापुरातून विद्यमान आमदार जयंत तासगावकर प्रबळ दावेदार असल्याची चर्चा आहे.मात्र, त्यांच्या कामाबाबत शिक्षकांमध्ये नाराजी असल्याचे बोलले जात आहे. त्यात महाविकास आघाडी यावेळी कोणाला उमेदवारी देणार हे अद्याप अधिकृतपणे जाहीर झालेले नाही.
सातारा व सांगली जिल्ह्यात मोठ्या शैक्षणिक संस्था असल्या तरी या जिल्ह्यातून स्वतंत्र असा प्रबळ दावेदार निवडणूक लढण्यास पुढे आल्याचे दिसले नाही. मात्र, साताऱ्यातील रयत शिक्षण संस्था आणि सांगलीतील भारतीय विद्यापीठ शैक्षणिक संस्था या दोन संस्थांमध्ये शिक्षक मतदार निश्चितच निवडणुकीच्या रिंगणात उभ्या असलेल्या उमेदवारांना आमदार करण्यात महत्त्वाची भूमिका बजावणार आहेत. मात्र, भारतीय जनता पक्षाच्या नेत्यांनी दोन्ही जागांवर दावा सांगितल्यामुळे सहयोगी पक्षांच्या इच्छुक उमेदवारांना संधी मिळणार का? असा प्रश्न निर्माण झाला आहे.
