MPSC विद्यार्थ्यांच्या मागण्यांसाठी पुण्यात २७ सप्टेंबरला आक्रोश ठिय्या आंदोलन

एज्युवार्ता न्यूज नेटवर्क 

महाराष्ट्र लोकसेवा आयोगाच्या अध्यक्षांच्या राजीनाम्यासह विविध मागण्यांसाठी पुण्यात विद्यार्थ्यांकडून २७ सप्टेंबर रोजी आंदोलन करण्यात येणार आहे. विद्यार्थ्यांच्या प्रमुख मागण्यांमध्ये स्वच्छ प्रतिमेच्या नवीन अध्यक्षांची विद्यार्थ्यांना विश्वासात घेऊन नियुक्ती, सर्व परीक्षा ऑफलाइन पद्धतीने घेणे, राजस्थान सरकारच्या धर्तीवर १०० रुपयांच्या कार्डवर वर्षभरातील सर्व परीक्षा घेणे तसेच ७० हजार पदांची भरती प्रक्रिया तातडीने सुरू करणे, यांचा समावेश आहे.

या आंदोलनाला परवानगी मिळावी यासाठी विद्यार्थ्यांच्या शिष्टमंडळासह पुणे पोलीस आयुक्तालयात सहपोलीस आयुक्त संजय दराडे यांची भेट घेऊन चर्चा करण्यात आली.

आंदोलनासाठी यापूर्वी २६ सप्टेंबर ही तारीख जाहीर करण्यात आली होती. मात्र, त्याच दिवशी दुपारपर्यंत गणेश विसर्जन मिरवणूक सुरू राहणार असून, मिरवणुकीच्या बंदोबस्तामुळे पोलिसांवर येणारा अतिरिक्त ताण लक्षात घेऊन आंदोलनाची तारीख २७ सप्टेंबर करण्याची मागणी करण्यात आली. त्यानुसार रविवारी, २७ सप्टेंबर रोजी सकाळी १० वाजल्यापासून पुण्यात गरवारे कॉलेज ते पत्रकार संघादरम्यानच्या एस. एम. जोशी पुलावर ‘विद्यार्थी आक्रोश ठिय्या आंदोलन’ करण्यात येणार असल्याचे आयोजकांनी सांगितले.

दरम्यान, विद्यार्थ्यांच्या मागण्यांवर तोडगा काढण्यासाठी सरकारने पुढाकार घेतल्यास त्याचे स्वागत करण्यात येईल, अशी भूमिका आंदोलनकर्त्यांनी मांडली आहे. मात्र, त्यासाठी राज्यभरात आंदोलन करणाऱ्या विद्यार्थी प्रतिनिधींशी सरकारने चर्चा करावी, अशी मागणी करण्यात आली आहे. यासाठी प्रमुख १५ विद्यार्थी प्रतिनिधींची यादी पोलिसांकडे देण्यात आल्याचेही सांगण्यात आले.

सरकारकडून विद्यार्थ्यांच्या प्रतिनिधींशी चर्चा झाली नाही, तर आंदोलन सुरूच ठेवण्याचा निर्धार आंदोलनकर्त्यांनी व्यक्त केला आहे. विद्यार्थ्यांवर किंवा क्लासचालकांवर दबाव आणला तरी आंदोलन मागे घेतले जाणार नाही, असा इशाराही यावेळी देण्यात आला.

यावेळी विद्यार्थी तसेच विविध पक्षांचे पदाधिकारी उपस्थित होते.