कोल्हापूर विद्यापीठ कुलगुरू निवडीचा तिढा सुटला; पाच नावे ठरली, 14 मे रोजी अंतिम मुलाखती
होमी भाभा विद्यापीठाचे कुलगुरू डॉ.आर.के.कामात, कोल्हापूर विद्यापीठाच्या प्र- कुलगुरू डॉ.ज्योती जाधव, नागपूर विद्यापीठाच्या डॉ.स्मिता देशमुख, सावित्रीबाई फुले पुणे विद्यापीठाच्या फिजिक्स विभागाचे माजी प्रमुख डॉ.संजय ढोले यांना मुलाखतीसाठी ई-मेल पाठवण्यात आला असल्याची माहिती विश्वसनीय सूत्रांनी दिली आहे.
eduvarta@gmail.com 
एज्युवार्ता न्यूज नेटवर्क
कोल्हापूर येथील शिवाजी विद्यापीठाच्या कुलगुरू निवडीच्या रखडलेल्या प्रक्रियेला अखेर गती मिळाली असून येत्या 14 मे रोजी सकाळी 11.30 वाजता कोल्हापूर विद्यापीठाच्या कुलगुरू पदाच्या मुलाखतीसाठी निवडण्यात आलेल्या उमेदवारांच्या मुलाखती घेतल्या जाणार आहेत. त्यामुळे लवकरच कोल्हापूर विद्यापीठाला पूर्णवेळ कुलगुरू मिळणार आहेत.
कोल्हापूर विद्यापीठाचे पूर्णवेळ कुलगुरू निवृत्त झाल्यानंतर सावित्रीबाई फुले पुणे विद्यापीठाचे कुलगुरू डॉ.सुरेश गोसावी यांच्याकडे विद्यापीठाच्या प्रभारी कुलगुरू पदाचा पदभार देण्यात आला. त्यानंतर पूर्णवेळ कुलगुरू पदासाठी सुमारे महिना भरापूर्वी पात्र उमेदवारांच्या मुलाखती घेण्यात आल्या. त्यानंतर कोणत्याही हालचाली होत नसल्यामुळे कुलगुरू निवड प्रक्रियेबाबत प्रश्न उपस्थित केले जात होते. मात्र, पाच उमेदवारांची नावे अंतिम कुलगुरू पदाच्या मुलाखतीसाठी निश्चित करण्यात आली असल्याचे स्पष्ट झाले आहे.
होमी भाभा विद्यापीठाचे कुलगुरू डॉ.आर.के.कामात, कोल्हापूर विद्यापीठाच्या प्र- कुलगुरू डॉ.ज्योती जाधव, कोल्हापूर विद्यापीठाचे माजी प्र. कुलगुरू डॉ.पी.एसपाटील,नागपूर विद्यापीठाच्या डॉ.स्मिता देशमुख, सावित्रीबाई फुले पुणे विद्यापीठाच्या फिजिक्स विभागाचे माजी प्रमुख डॉ.संजय ढोले यांना मुलाखतीसाठी ई-मेल पाठवण्यात आला असल्याची माहिती विश्वसनीय सूत्रांनी दिली आहे.
होमी भाभा विद्यापीठाचे कुलगुरू डॉ. कामत यांचे नाव सध्या आघाडीवर असून त्यांना कोल्हापूर विद्यापीठाच्या पूर्णवेळ कुलगुरू पदी काम करण्याची संधी मिळू शकते, अशी चर्चा शिक्षण वर्तुळात केली जात आहे. मात्र, राज्यपाल कार्यालयात होणाऱ्या मुलाखतीनंतरच पुढील चित्र स्पष्ट होईल.त्यामुळे सध्या वर्तवण्यात येत असलेल्या अंदाजांना फारसे महत्त्व देता येत नाही, असे तज्ञांकडून सांगितले जात आहे.
