मुंबई हादरली: कॉलेज नाईट पार्टीत तरुणीवर लैंगिक अत्याचार; छत्तीसगडमधून आरोपीला अटक
मुंबईतील मालाड पश्चिमेकडील मढ आयलंड परिसरात एका कॉलेज विद्यार्थिनीवर नाईट पार्टीदरम्यान लैंगिक अत्याचार झाल्याची धक्कादायक घटना उघडकीस आली आहे.
Eduvarta
एज्युवार्ता न्यूज नेटवर्क
मुंबईतील मालाड पश्चिमेकडील मढ आयलंड परिसरात एका कॉलेज विद्यार्थिनीवर नाईट पार्टीदरम्यान लैंगिक अत्याचार झाल्याची धक्कादायक घटना उघडकीस आली आहे. विलेपार्ले येथील नामांकित कॉलेजच्या विद्यार्थ्यांच्या गटाने खासगी रिसॉर्टमध्ये पार्टीचे आयोजन केले होते. या पार्टीत सहभागी झालेल्या तरुणीच्या पेयात गुंगीचे औषध मिसळण्यात आल्याचा आरोप आहे. पेय सेवनानंतर ती बेशुद्ध अवस्थेत गेली आणि त्याचा गैरफायदा घेत आरोपीने तिच्यावर अत्याचार केल्याची तक्रार समोर आली आहे. या घटनेने संपूर्ण मुंबई हादरली आहे.
घटनेनंतर घाबरलेल्या तरुणीने आपल्या पालकांना सर्व प्रकार सांगितला. पालकांनी तिला सोबत घेऊन ताबडतोब पोलिसांकडे धाव घेतली. घटना मढ आयलंड परिसरात घडल्याने मालवणी पोलीस ठाण्यात झिरो एफआयआर दाखल करण्यात आली. पुढील तपासासाठी प्रकरण जुहू पोलीस ठाण्याकडे सोपवण्यात आले. जुहू पोलिसांनी याबाबत गुन्हा दाखल करून तपास सुरू केला. आरोपी मुंबईतून फरार झाला होता आणि छत्तीसगडमधील आपल्या मूळ गावी लपून बसला होता, अशी माहिती पोलिसांना मिळाली.
तांत्रिक तपास आणि सर्व्हेलन्सच्या आधारे जुहू पोलिसांच्या विशेष पथकाने छत्तीसगडमध्ये छापा टाकून मुख्य आरोपीला अटक केली. त्याला मुंबईत आणून न्यायालयात हजर करण्यात आले असता त्याला पोलीस कोठडी सुनावण्यात आली आहे. एफआयआरमध्ये आणखी एका संशयिताचे नाव समोर आले आहे. मात्र, त्या व्यक्तीचा अत्याचाराच्या घटनाक्रमात प्रत्यक्ष सहभाग आहे की नाही, हे अद्याप स्पष्ट झालेले नाही. पोलिसांनी याबाबतही चौकशी सुरू केली आहे.
या प्रकरणाचा पुढील तपास जुहू पोलीस वेगाने सुरू ठेवून आहेत. पीडितेच्या विधानांसह उपलब्ध पुराव्यांची छाननी केली जात आहे. अशा प्रकारच्या घटनांमुळे तरुण-तरुणींमध्ये भीतीचे वातावरण निर्माण झाले आहे. पोलिसांनी जनतेला सतर्क राहण्याचे आवाहन केले असून, कोणतीही महत्त्वाची माहिती मिळाल्यास ताबडतोब कळविण्याची विनंती केली आहे. तपासातील पुढील घडामोडी लवकरच समोर येण्याची शक्यता आहे.
