हेअर कटचा अजब फतवा! आश्रमशाळेतील विद्यार्थ्यांची अर्धवट कटिंग; व्हिडिओ व्हायरल होताच प्रशासनाला जाग..

चंद्रपूर जिल्ह्यातील चिमूर तालुक्यातील जांभुळघाट येथील शासकीय आदिवासी आश्रमशाळेत नुकताच एक अजब आणि धक्कादायक प्रकार समोर आला आहे. शाळेतील शिस्त राखण्याच्या नावाखाली विद्यार्थ्यांना बंधनकारक हेअर कट करण्याचे निर्देश देण्यात आले होते.

हेअर कटचा अजब फतवा! आश्रमशाळेतील विद्यार्थ्यांची अर्धवट कटिंग; व्हिडिओ व्हायरल होताच प्रशासनाला जाग..

एज्युवार्ता न्यूज नेटवर्क  

चंद्रपूर जिल्ह्यातील चिमूर तालुक्यातील जांभुळघाट येथील शासकीय आदिवासी आश्रमशाळेत नुकताच एक अजब आणि धक्कादायक प्रकार समोर आला आहे. शाळेतील शिस्त राखण्याच्या नावाखाली विद्यार्थ्यांना बंधनकारक हेअर कट करण्याचे निर्देश देण्यात आले होते. या आदेशानुसार शनिवारी शाळेच्या परिसरातच विद्यार्थ्यांचे केस कापण्यास सुरुवात झाली. मात्र या प्रक्रियेदरम्यान एक अनपेक्षित अडथळा निर्माण झाला आणि अनेक विद्यार्थी अर्धवट हेअर कटच्या अवस्थेत बसून राहिले. या घटनेने सोशल मीडियावर तीव्र चर्चा सुरू झाली असून आदिवासी विकास विभागापुढेही स्पष्टीकरणाची वेळ आली आहे.

मिळालेल्या माहितीनुसार, आश्रमशाळेच्या अधीक्षकांनी सर्व विद्यार्थ्यांना शिस्तीचा भाग म्हणून हेअर कट अनिवार्य केला होता. विद्यार्थी टाळाटाळ करू नयेत म्हणून शाळेच्याच परिसरात कटिंग सुरू करण्यात आली. कामादरम्यान वापरण्यात येणाऱ्या ट्रिमरची चार्जिंग संपली. त्यामुळे काही विद्यार्थ्यांची पूर्ण कटिंग होऊ शकली नाही. या विद्यार्थ्यांना अर्ध्याच केसांच्या अवस्थेत बसवून ठेवण्यात आले. याच वेळी कोणीतरी त्यांचे फोटो काढून सोशल मीडियावर अपलोड केले. फोटो पाहताच अनेक नागरिकांनी नाराजी व्यक्त केली आणि प्रकरण लवकरच व्हायरल झाले.

फोटो व्हायरल झाल्यानंतर आदिवासी विकास विभागाच्या वरिष्ठ अधिकाऱ्यांनाही याची माहिती मिळाली. त्यांनी तातडीने हस्तक्षेप करत उरलेल्या विद्यार्थ्यांचे व्यवस्थित हेअर कट पूर्ण करण्याचे कठोर निर्देश दिले. त्यानंतर रात्री उशिरापर्यंत सर्व विद्यार्थ्यांचे केस नीट कापून प्रकरण मिटविण्यात आले. तरीही अर्धवट कटिंग करून विद्यार्थ्यांना बसवून ठेवल्याच्या दृश्यामुळे शाळेतील शिस्तीच्या पद्धतीवर गंभीर प्रश्नचिन्ह निर्माण झाले आहे. विद्यार्थ्यांच्या शिस्तीची गरज असली तरी अशा अमानवीय आणि अपमानास्पद पद्धतीने वागणूक देणे योग्य होते का, असा सवाल आता सर्वत्र उपस्थित केला जात आहे.

या संपूर्ण प्रकारामुळे आश्रमशाळांमधील शिस्त व्यवस्थापनाबाबत पुनर्विचार करण्याची गरज स्पष्ट झाली आहे. विद्यार्थ्यांच्या आत्मसन्मानाचा विचार करताना अधिक संवेदनशील आणि व्यवस्थित नियोजन अपेक्षित आहे. आदिवासी विकास विभागाने या प्रकरणाची गंभीर दखल घेऊन संबंधित अधिकाऱ्यांकडून स्पष्टीकरण मागितले आहे. भविष्यात अशा घटना टाळण्यासाठी कठोर मार्गदर्शक तत्त्वे जारी करण्याची मागणीही आता जोर धरू लागली आहे.