सुंदर बाई मराठे विद्यालयाला सलग तिसऱ्या वर्षी “सर्वोत्कृष्ट शाळा” पुरस्कार

पुणे : खराडी येथील गेनबा सोपानराव मोझे संस्थेच्या Sundarabai Marathe Vidyalaya या विद्यालयाने सलग तिसऱ्या वर्षी “सर्वोत्कृष्ट शाळा” हा मान पटकावत एन. के. महाजन ट्रॉफी जिंकण्याची उल्लेखनीय कामगिरी केली आहे. ही ट्रॉफी Indian Red Cross Society, पुणे यांच्या वतीने दरवर्षी प्रदान करण्यात येते.

इंडियन रेड क्रॉस सोसायटीतर्फे प्राथमिक, माध्यमिक, उच्च माध्यमिक तसेच वरिष्ठ महाविद्यालयीन विद्यार्थ्यांसाठी विविध आंतरशालेय स्पर्धांचे आयोजन करण्यात येते. यामध्ये समूहगीत, वक्तृत्व, निबंध, चित्रकला, पथनाट्य, नृत्य आणि गायन अशा विविध स्पर्धांचा समावेश असतो. यंदा या सर्व स्पर्धांमध्ये सुंदरबाई मराठे विद्यालयातील विद्यार्थ्यांनी मोठ्या उत्साहाने सहभाग घेत प्रथम, द्वितीय व तृतीय क्रमांकांची बहुसंख्य बक्षिसे पटकावली.

तसेच, शाळेत वर्षभर विविध उपक्रम आणि स्पर्धा Junior Red Cross Society, पुणे यांच्या मार्गदर्शनाखाली राबविण्यात येतात. याच सातत्यपूर्ण प्रयत्नांमुळे विद्यालयाने यंदाही “सर्वोत्कृष्ट शाळा” किताबाची हॅट्रिक साधली आहे.पुरस्कार वितरण सोहळा Dr. Cyrus Poonawalla School for Hearing Impaired Children येथे संपन्न झाला. या कार्यक्रमाला डॉ. भारती उपाध्ये (उपप्राचार्य, बी.एम.सी.सी. कॉलेज), रेड क्रॉस संस्थेचे सचिव व्ही. एस. कुलकर्णी, डॉ. शंतनू गोखले आणि डॉ. राजकुमार शहा आदी मान्यवर उपस्थित होते.

यावेळी विद्यालयातील विद्यार्थ्यांनी समाज माध्यमांचे दुष्परिणाम, व्यसनाधीनता आणि अंधश्रद्धा निर्मूलन या ज्वलंत विषयांवर प्रभावी पथनाट्य सादर केले. त्यांच्या सादरीकरणाचे उपस्थितांकडून भरभरून कौतुक करण्यात आले.

या यशामागे विद्यालयातील पर्यवेक्षक सुनील वळसे,  विद्या कव्हेकर,  रोहन खैरे, मीनाक्षी शहापूरे, मोनिका शेलार तसेच शिक्षकवृंद यांचे मार्गदर्शन लाभले. या उल्लेखनीय कामगिरीबद्दल संस्थेचे अध्यक्ष  रामभाऊ मोझे, उपाध्यक्ष  ज्ञानेश्वर मोझे,  संजय मोझे, शाळा समिती अध्यक्षा  अलका पाटील आणि मुख्याध्यापक संजय सोमवंशी यांनी विद्यार्थी व शिक्षकांचे अभिनंदन केले.