शिवाजी विद्यापीठाच्या नामविस्ताराचा वाद पेटला, शिवप्रेमी आणि हिंदुत्ववादी संघटना आमने-सामने
शिवप्रेमी संघटनांचे म्हणणे आहे की, शिवाजी विद्यापीठाचा नामविस्तार करू नये. सध्या असलेले 'शिवाजी विद्यापीठ' हेच नाव कायम ठेवण्यात यावे. तर हिंदुत्ववादी संघटनांनी शिवाजी विद्यापीठ हे नाव बदलून 'छत्रपती शिवाजी महाराज विद्यापीठ' असा नामविस्तार करण्यात यावा ही मागणी केली आहे. त्यामुळे कोल्हापूरात शिवप्रेमी आणि हिंदूत्ववादी संघटना आमने-सामने आल्या आहेत.
eduvarta@gmail.com 
एज्युवार्ता न्यूज नेटवर्क
कोल्हापूर येथील शिवाजी विद्यापीठाच्या (Shivaji University Kolhapur) नामविस्ताराचा (University name extension) मुद्दा चांगलाच पेटला आहे. विशेष म्हणजे यामध्ये शिवप्रमी आणि हिंदुत्ववादी संघटना (Shiva-loving and Hindutva organizations) आमने-सामने आल्या आहेत. शिवप्रेमी संघटनांचे म्हणणे आहे की, शिवाजी विद्यापीठाचा नामविस्तार करू नये. सध्या असलेले 'शिवाजी विद्यापीठ' हेच नाव कायम ठेवण्यात यावे. तर हिंदुत्ववादी संघटनांनी शिवाजी विद्यापीठ हे नाव बदलून 'छत्रपती शिवाजी महाराज विद्यापीठ' (Chhatrapati Shivaji Maharaj University name extension) असा नामविस्तार करण्यात यावा ही मागणी केली आहे. त्यामुळे कोल्हापूरात शिवप्रेमी आणि हिंदूत्ववादी संघटना आमने-सामने आल्या आहेत.
शिवाजी विद्यापीठाची आज अधिसभा असून यामध्ये विद्यापीठाच्या नामविस्ताराचा विषय गाजण्याची शक्यता आहे. विद्यापीठाच्या अधिसभेची बैठक राजर्षी शाहू सभागृहात होणार आहे. अनेक संघटनांनी हा विषय लावून धरल्याने याचे राजकीय पडसादही उमटत आहेत. हिंदुत्ववादी संघटना हा विषय आक्रमकपणे मांडत आहेत. त्यांच्या वतीने जिल्हाधिकारी कार्यालयावर सोमवारी भव्य मोर्चा काढण्यात येणार आहे.
पुरोगामी संघटनांनीही शिवाजी विद्यापीठाचा नामविस्तार करण्यास तीव्र विरोध दर्शविला आहे. याचे पडसाद अधिसभा बैठकीतही उमटण्याची शक्यता आहे. यापूर्वीही नामविस्ताराची मागणी झाली होती. तो विषय अधिसभेत आल्यानंतर त्याला विरोध दर्शवण्यात आला होता. त्यामुळे आजच्या बैठकीत काय होते, याकडे सर्वांचे लक्ष आहे.
शिवाजी विद्यापीठाचा नामविस्तार करा, या मागणीसाठी हिंदुत्ववादी संघटनांच्या वतीने १७ मार्चला मोर्चा काढण्यात येणार आहे. या पार्श्वभूमीवर शिवप्रेमींची कोल्हापुरातील चित्रदुर्ग मठात बैठक झाली. या बैठकीत नामविस्ताराच्या मागणीला समर्थन देणारे खासदार धैर्यशील माने, आमदार अमल महाडिक, आमदार चंद्रदीप नरके, आमदार राजेंद्र पाटील-यड्रावकर व आमदार अशोकराव माने यांचा जाहीर निषेध करण्यात आला.
_________________________________
शिवाजी हा शब्दच मराठी माणसाची अस्मिता आहे. या शब्दातच प्रचंड ताकद आहे. त्यामुळे विद्यापीठाचे दिलेले नाव योग्य आहे. ते बदलण्याचा प्रयत्न कोणी करू नये. जे बदलू इच्छितात त्यांना या दिलेल्या नावामागचा इतिहास समजावून सांगू. छत्रपती शिवाजी महाराज हे नाव दिले तर त्याला CSM विद्यापीठ म्हणून ओळखले जाईल. जसे JNU सह अन्य विद्यापीठे ओळखली जातात, तसेच हे विद्यापीठ देखील ओळखले जाईल, त्यामुळे शिवाजी विद्यापीठ हे नाव योग्य आहे.
जयसिंगराव पवार, ज्येष्ठ इतिहास संशोधक
