पेपरफुटी रोखण्यासाठी मार्गदर्शक नियमावली तयार करा; उच्च व तंत्रशिक्षण मंत्री चंद्रकांत पाटील यांच्या विद्यापीठांना सूचना

एज्युवार्ता न्यूज नेटवर्क 

परीक्षांमधील पेपरफुटीच्या वाढत्या प्रकरणांना आळा घालण्यासाठी उच्च आणि तंत्रशिक्षण मंत्री चंद्रकांत पाटील (Chandrakant Patil) यांनी राज्यातील सार्वजनिक विद्यापीठांना महत्त्वपूर्ण सूचना (Important instructions for universities) दिल्या आहेत. केंद्र सरकारच्या धर्तीवर विभागाने मार्गदर्शक नियमावली (Guidance Manual) तयार करून ती प्रसिद्ध करावी, तसेच पेपरफुटी रोखण्यासाठी संबंधित अधिकारी व कर्मचाऱ्यांची जबाबदारी निश्चित करणारे परिपत्रक निर्गमित करावे, असे निर्देश राज्यातील सर्व सार्वजनिक विद्यापीठांच्या कुलगुरूंची ऑनलाइन बैठकीत (Online meeting of Vice-Chancellors) बोलताना त्यांनी दिले. 

राष्ट्रीय शैक्षणिक धोरणाची प्रभावी अंमलबजावणी करण्यासाठी सर्व विद्यापीठांनी एकसमान शैक्षणिक वेळापत्रक राबवावे, असे पाटील यांनी सांगितले. शैक्षणिक वर्ष २०२६-२७ आणि २०२७-२८ पासून चौथ्या वर्षाच्या ऑनर्स पदवी अभ्यासक्रमाची यशस्वी अंमलबजावणी होण्यासाठी आवश्यक शैक्षणिक आराखडा तयार करण्याचेही निर्देश त्यांनी दिले. यामुळे राज्यातील उच्च शिक्षण व्यवस्था अधिक सुसंगत आणि गुणवत्तापूर्ण होण्यास मदत होईल, असा विश्वास व्यक्त करण्यात आला.

विद्यार्थ्यांच्या अडचणी आणि शैक्षणिक समस्या थेट जाणून घेण्यासाठी प्रत्येक विद्यापीठाच्या कुलगुरू व प्र-कुलगुरूंनी आठवड्यातून एक दिवस किमान पन्नास विद्यार्थ्यांशी संवाद साधावा, अशी महत्त्वाची सूचना पाटील यांनी केली. यामुळे विद्यार्थ्यांचे प्रश्न वेळेवर सोडविण्यास मदत होईल. राष्ट्रीय शैक्षणिक धोरणाच्या अंमलबजावणीसाठी राज्यातील महाविद्यालयांचे क्लस्टर निश्चित करून त्यांच्यामध्ये मनुष्यबळ, पायाभूत सुविधा, प्रयोगशाळा, ग्रंथालये आणि इतर शैक्षणिक संसाधनांचे सामायिकरण वाढविण्याचे आवाहनही त्यांनी केले.

इतर राज्यांमध्ये राष्ट्रीय शैक्षणिक धोरणाची अंमलबजावणी कशी केली जाते, याचा अभ्यास करण्यासाठी परीक्षा नियंत्रक विभागाच्या प्रमुखांची कार्यशाळा आयोजित करण्याच्या सूचना बैठकीत देण्यात आल्या. मुंबई विद्यापीठासह विविध विद्यापीठांनी तयार केलेल्या समूह अभ्यासक्रमांचा सखोल अभ्यास करून राज्यासाठी सर्वसमावेशक आणि गुणवत्तापूर्ण क्लस्टर अभ्यासक्रम तयार करावा, असेही पाटील यांनी सांगितले. प्रत्येक विद्यापीठाने दर महिन्याला किमान एक क्लस्टर उपक्रम राबवावा, यामुळे संसाधनांचा योग्य वापर होईल आणि शैक्षणिक गुणवत्ता वाढेल.

या सूचनांमुळे राज्यातील उच्च शिक्षण क्षेत्रात पारदर्शकता आणि शिस्त येण्यास मदत होईल, असा विश्वास व्यक्त केला जात आहे. पेपरफुटीसारख्या गंभीर समस्यांवर नियंत्रण मिळविण्यासाठी आणि राष्ट्रीय शैक्षणिक धोरणाची यशस्वी अंमलबजावणी करण्यासाठी विद्यापीठांनी या निर्देशांची काटेकोर अंमलबजावणी करावी, असे आवाहन मंत्र्यांनी केले. बैठकीत सर्व कुलगुरूंनी या सूचनांचे पालन करण्याचे आश्वासन दिले आहे.