स्कूल बसचालकाकडून शिक्षिकेवर लैंगिक अत्याचार 

एज्युवार्ता न्यूज नेटवर्क 

राज्यात शालेय विद्यार्थी, विद्यार्थिनी, शिक्षिका यांच्यावर होणाऱ्या अत्याचाराचा आलेख उंच मनोऱ्यासारखा फोफावला असतानाच आता आणखी एक धक्कादायक घटना छत्रपती संभाजीनगरच्या (Chhatrapati Sambhajinagar Crime News) सिडको परिसरात घडली आहे. शालेय बसचालकाने एका शिक्षिकेला गुंगीचे औषध पाजून तिच्यावर शारीरिक अत्याचार (Torture on teacher) केल्याची घटना उघडकीस आली आहे. अखेर आरोपीच्या धमकीला न जुमानता पीडित शिक्षिकेने अंबड पोलिस ठाण्यात आरोपीविरुद्ध बलात्काराचा गुन्हा दाखल केला आहे

आरोपी बसचालक मागील दोन वर्षांपासून पीडित शिक्षिकेला वारंवार फोनवरून मॅसेज करून अश्लील व्हिडीओ आणि फोटो व्हायरल करण्याची धमकी देत होता. शहरातील एका शाळेत शिक्षिका म्हणून नोकरीला असलेल्या पीडित महिलेला तेथील शाळेतील बस चालक संशयित राहुल पाटील याने पीडितेसोबत २०२३ साली ओळख करून मैत्रीचा बनाव केला. त्यानंतर मोबाइल क्रमांकाची देवाणघेवाण करत मेसेजेस करून संवाद वाढविला. 

एके दिवशी घरात कोणी नसल्याची संधी साधून पीडित महिलेला आरोपीने गुंगीचे औषध पाजून शारीरिक अत्याचार व अनैसर्गिक शारीरिक संबंध प्रस्थापित केल्याचे फिर्यादीत म्हटले आहे. आरोपीने अत्याचाराचे फोटो, व्हिडिओ काढून त्याद्वारे पीडित महिलेला बदनामीची भीती दाखवून वारंवार अत्याचार केल्याचा आरोप करण्यात आला आहे.