शिक्षकांना मोठा दिलासा! 'या' कारणामुळे शिक्षक प्रशिक्षणाच्या तारखा पुढे ढकलल्या

एज्युवार्ता न्यूज नेटवर्क

जनगणनेच्या पार्श्वभूमीवर इयत्ता दुसरी, तिसरी आणि चौथीच्या नवीन अभ्यासक्रम शिक्षक प्रशिक्षणाच्या तालुकास्तरीय तारखा पुढे ढकलण्यात (The dates were postponed) आल्या आहेत. राज्य शैक्षणिक संशोधन व प्रशिक्षण परिषदेचे (SCERT) संचालक डॉ. हेमंत कुमार वसेकर (Dr. Hemant Kumar Wasekar) यांनी याबाबत औपचारिक पत्र (formal letter) काढले आहे. याबाबतची माहिती महाराष्ट्र राज्य प्राथमिक शिक्षक समितीचे राज्याध्यक्ष विजय कोंबे (Vijay Kombe) यांनी दिली आहे. 

२०२७ च्या जनगणनेसाठी कुटुंब गणनेचे काम १६ मे ते १४ जून या कालावधीत होणार आहे. यासाठी राज्यातील स्थानिक स्वराज्य संस्थांच्या शाळांमधील जवळपास सर्व शिक्षकांची सेवा अधिग्रहित करण्यात आली आहे. मात्र, याच कालावधीत SCERT ने नवीन अभ्यासक्रमाचे शिक्षक प्रशिक्षणाचे कार्यक्रम नियोजित केले होते. दोन्ही महत्त्वाच्या जबाबदाऱ्या एकाच वेळी येत असल्याने शिक्षकांना अडचण होणार होती.

याबाबत महाराष्ट्र राज्य प्राथमिक शिक्षक समितीने तातडीने हालचाल केली. समितीने राज्य शैक्षणिक संशोधन व प्रशिक्षण परिषदेकडे प्रशिक्षण पुढे ढकलण्याची मागणी केली. तसेच राज्याच्या मुख्य प्रधान जनगणना संचालकांकडे पत्र पाठवले आणि सर्व जिल्हाधिकाऱ्यांना निवेदन दिले. या प्रयत्नांना यश मिळाले असून, SCERT आणि राज्य जनगणना कार्यालयातील अधिकाऱ्यांच्या सभेत चर्चा होऊन तालुकास्तरीय प्रशिक्षण कार्यक्रम सद्यस्थितीत पुढे ढकलण्याचा निर्णय झाला आहे.

मंत्रालयात शालेय शिक्षण राज्यमंत्री डॉ. पंकज भोयर यांच्या अध्यक्षतेखालील बैठकीत विजय कोंबे यांनी ही मागणी पुन्हा लावून धरली होती. राज्यमंत्री डॉ. भोयर यांनी शिक्षण विभागाला प्रशिक्षण कार्यक्रमात आवश्यक बदल करण्याचे निर्देश दिले होते. त्यानंतर आता हा निर्णय घेण्यात आला आहे. “जनगणना ही राष्ट्रीय महत्त्वाची जबाबदारी आहे. शिक्षकांनी पूर्ण जबाबदारीने भाग घ्यावा, यासाठी आम्ही सातत्याने प्रयत्न करत आहोत. एकाच वेळी दोन महत्त्वाच्या कामांमुळे शिक्षकांवर ताण पडू नये, यासाठी आम्ही प्रशिक्षण पुढे ढकलण्याची मागणी केली होती. ही मागणी मान्य झाल्याने शिक्षकांना दिलासा मिळाला आहे,” अशी माहिती विजय कोंबे यांनी दिली.