नोकरीची सुवर्णसंधी! करन्सी नोट प्रेस नाशिकमध्ये 534 पदांची भरती प्रक्रिया सुरू 

एज्युवार्ता न्यूज नेटवर्क 

नोकरीच्या शोधात असलेल्या तरुणांसाठी करन्सी नोट प्रेस (Currency Note Press), नाशिक येथे मोठी संधी उपलब्ध झाली आहे. सिक्युरिटी प्रिंटिंग अँड मिंटिंग कॉर्पोरेशन ऑफ इंडिया लिमिटेड (SPMCIL) अंतर्गत येणाऱ्या या संस्थेमार्फत विविध पदांसाठी एकूण 534 रिक्त जागांची भरती जाहीर (Recruitment Announced) करण्यात आली आहे. इच्छुक आणि पात्र उमेदवारांकडून या पदांसाठी ऑनलाईन अर्ज मागविण्यात येत आहेत. अर्ज प्रक्रिया सुरू झाली असून, अर्ज करण्याची अंतिम मुदत 19 मे 2026 निश्चित करण्यात आली आहे. उमेदवारांना अधिकृत संकेतस्थळ cnpnashik.spmcil.com वर जाऊन अर्ज सादर करणे आवश्यक आहे. 

या भरती मोहिमे अंतर्गत ज्युनियर टेक्निशियन, सुपरवायझर, ज्युनियर ऑफिस असिस्टंट, वेल्फेअर ऑफिसर, सेफ्टी ऑफिसर तसेच इतर तांत्रिक व प्रशासकीय पदांचा समावेश आहे. त्यामुळे शैक्षणिक पात्रता ITI, डिप्लोमा, अभियांत्रिकी, पदवीधर यासह पदाच्या आवश्यकतेनुसार असणार आहे. यासाठी उमेदवाराचे वय किमान 18 ते कमाल 30 पर्यंत असणे आवश्यक आहे. आरक्षित प्रवर्गातील उमेदवारांना भरती नियमानुसार सूट देण्यात येणार आहे. तसेच सर्वसाधारण, ईडब्ल्यूएस आणि ओबीसी प्रवर्गातील उमेदवारांसाठी एक हजार रुपये अर्ज शुल्क आकारण्यात आला आहे, तर अनुसूचित जाती/जमाती/दिव्यांग प्रवर्गातील उमेदवारांना दोनशे रुपये अर्ज शुल्क असणार आहे. 

निवड प्रक्रिया टप्प्याटप्प्याने पार पडणार असून त्यामध्ये ऑनलाईन लेखी परीक्षा, काही पदांसाठी कौशल्य चाचणी आणि कागदपत्र पडताळणीचा समावेश असेल. अंतिम निवड उमेदवारांच्या गुणवत्तेनुसार केली जाणार आहे. त्यामुळे उमेदवारांनी परीक्षेची तयारी योग्य पद्धतीने करणे आवश्यक आहे. करन्सी नोट प्रेस, नाशिक ही देशातील महत्त्वाची संस्था असून येथे भारतीय चलनाच्या नोटा छापण्याचे काम केले जाते. त्यामुळे या संस्थेत काम करण्याची संधी मिळणे हे अनेकांसाठी प्रतिष्ठेचे मानले जाते.