‘महाज्योती’च्या परीक्षेतही गैरप्रकार; उमेदवारांच्या तक्रारींनंतर चौकशी सुरू
महाज्योतीकडून प्रशिक्षणासाठी दिल्ली व पुण्यातील प्रशिक्षण संस्थांमध्ये तयारीसाठी १३ हजार रुपये मानधन दिले जाते. त्यासाठी १६ जुलै रोजी राज्यभरात परीक्षा घेण्यात आली.
eduvarta@gmail.com 
एज्युवार्ता न्यूज नेटवर्क
महात्मा ज्योतिबा फुले संशोधन व प्रशिक्षण संस्थेच्या (Mahajyoti) वतीने केंद्रीय लोकसेवा आयोगाच्या (UPSC) पूर्व परीक्षा प्रशिक्षणासाठी (UPSC Training) उमेदवारांना आर्थिक सहकार्य केले जाते. त्यासाठी महाज्योतीकडून काही दिवसांपूर्वीच चाळणी परीक्षा घेण्यात आली. पण या परीक्षेतच गैरप्रकार झाल्याचा आरोप परीक्षार्थींकडून करण्यात आले आहेत. चौकशी करून पुन्हा परीक्षा घेण्याची मागणीही परीक्षार्थींनी केली आहे.
महाज्योतीकडून प्रशिक्षणासाठी दिल्ली व पुण्यातील प्रशिक्षण संस्थांमध्ये तयारीसाठी १३ हजार रुपये मानधन दिले जाते. त्यासाठी १६ जुलै रोजी राज्यभरात परीक्षा घेण्यात आली. त्यासाठी जवळपास २० हजार जणांनी ही परीक्षा देण्यात आली होती. मात्र, परीक्षेदरम्यान काही गैरप्रकार घडल्याच्या तक्रारी महाज्योतीकडे करण्यात आल्या आहेत.
तलाठी भरती : अर्ज भरण्यासाठी मुदतवाढीबाबत उपमुख्यमंत्र्यांची विधानसभेत महत्वाची माहिती
काही परीक्षार्थींनी परीक्षेदरम्यान मोबाईलचा वापर केल्याचा दावा करण्यात आला आहे. तसेच काही परीक्षा केंद्रांकडूनच परीक्षार्थींना मदत केल्याचा गंभीर आरोपही करण्यात आला आहे. याबाबत स्टुडंट्स राईट्स असोसिएशन ऑफ इंडियाचे अध्यक्ष उमेश कोरराम यांनी महाज्योतीकडे तक्रार दिली आहे. त्यानुसार चौकशी सुरू करण्यात आल्याची माहिती कोरराम यांनी एज्युवार्ताशी बोलताना दिली.
कोरराम यांनी सांगितले की, परीक्षेदरम्यान पुणे, नाशिक औरंगाबाद येथील काही परीक्षा केंद्रांवर परीक्षेदरम्यान मोबाईलचा वापर करण्यात आल्याच्या तक्रारी आहेत. प्रश्न सोडविण्यासाठी गुगलचा आधार घेण्यात आला. विद्यार्थी गटा-गटाने परीक्षा देत होते. केंद्रात पर्यवेक्षकही नव्हते, अशा तक्रारी करण्यात आल्या आहे. त्याचे निवेदन महाज्योतीला देऊन चौकशी करण्याची मागणी केली आहे. त्यानुसार चौकशी सुरू केल्याची माहिती व्यवस्थापकीय संचालक राजेश खवले यांनी दिल्याचे कोरराम यांनी सांगितले.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
