नीट परीक्षेत गैरप्रकर! एनटीएने तपास यंत्रनांना पाठवली माहिती, राजस्थानमधून १३ जण ताब्यात

एज्युवार्ता न्यूज नेटवर्क 

देशातील सर्वात मोठ्या वैद्यकीय प्रवेश परीक्षा नीट यूजी २०२६ वर (NEET UG 2026) पुन्हा एकदा गैरप्रकार आणि पेपर लीकच्या (Malpractices and Paper Leaks) संशयाचे ढग दाटले आहेत. ३ मे २०२६ रोजी देशभरात पार पडलेल्या परीक्षेनंतर अवघ्या चार दिवसांत राष्ट्रीय परीक्षा एजन्सीला (NTA) कथित अनियमिततेची माहिती मिळाली. या पार्श्वभूमीवर राजस्थान पोलिसांच्या स्पेशल ऑपरेशन ग्रुपने (एसओजी) मोठी कारवाई करत १३ संशयितांना ताब्यात (13 Suspects Detained) घेतले आहे. 

एनटीएने जारी केलेल्या अधिकृत निवेदनात स्पष्ट केले की, परीक्षेशी संबंधित कथित गैरप्रकाराच्या इनपुट्स मिळाल्या. हे इनपुट्स केंद्रीय एजन्सींकडे पाठवण्यात आले. एसओजीने इंटेलिजन्स ब्युरो (आयबी) च्या इनपुटवर आधारित कारवाई करत देहरादून, सीकर आणि झुंझुनू येथून १३ जणांना ताब्यात घेतले आहेत. यात सीकर येथील एका नामांकित कोचिंग संस्थेतील करिअर काउंसलरचा समावेश आहे. या संशयितांकडून मिळालेल्या ‘गेस पेपर’मध्ये नीट परीक्षेतील अनेक प्रश्न हूबेहूब जुळल्याचे प्राथमिक तपासात समोर आले आहे. 

एनटीएने मात्र परीक्षा पूर्णपणे सुरक्षित वातावरणात घेण्यात आल्याचे सांगितले. परीक्षा केंद्रांवर एआय आधारित सीसीटीव्ही, बायोमेट्रिक व्हेरिफिकेशन, जीपीएस ट्रॅकिंग असलेल्या वाहनांद्वारे प्रश्नपत्रिका वाहतूक आणि ५जी जॅमर्सचा वापर करण्यात आला होता. तरीही काही केंद्रांवर अनियमितता झाल्याच्या शक्यता नाकारता येत नाहीत. एनटीएने विद्यार्थ्यांना सोशल मीडियावरील विशेषतः टेलीग्राम फसवे दावे आणि कथित पेपर लीकच्या अफवांपासून सावध राहण्याचा इशारा दिला आहे. अशा फसव्या लोकांवर कायदेशीर कारवाई केली जाईल, असेही स्पष्ट केले.

२०२४ च्या नीट घोटाळ्यानंतर यंदाही ही बाब गांभीर्याने घेण्यात आली आहे. लाखो विद्यार्थी आणि पालक चिंतेत आहेत. तपास अजून सुरू असून, दोषींवर कठोर कारवाई होईल, असे एनटीएने आश्वासन दिले आहे. निकाल जाहीर होण्यापूर्वी या प्रकरणाचा पूर्ण रिपोर्ट येणे अपेक्षित आहे.