विद्यार्थ्यांनी उत्तम  सादरीकरण करून व्यक्तिमत्व विकास घडवावा : प्राचार्या डॉ. नेहा बेलसरे

एज्युवार्ता न्यूज नेटवर्क

विद्यार्थ्यांच्या कलागुणांना वाव देणारे हे व्यासपीठ आहे. विद्यार्थ्यांनी अधिक उत्तम  सादरीकरण करून व्यक्तिमत्व विकास (Personality development) घडवला पाहिजे. या नाट्य स्पर्धेचा दर्जा (quality of theatrical competition) आणखी कसा उंचावता येईल यासाठी सुद्धा शिक्षकांनी कटिबद्ध राहिले पाहिजे. असे मत प्राचार्या डॉ. नेहा बेलसरे (Dr. Neha Belsare) यांनी नुकत्याच पार पडलेल्या यशवंतराव चव्हाण नाट्य स्पर्धेचा (Yashwantrao Chavan Drama Competition) जिल्हास्तरीय पारितोषिक वितरण सोहळ्यात (District level prize distribution ceremony) मांडले. 
 
जिल्हा शिक्षण व प्रशिक्षण संस्था पुणे आणि पुणे जिल्हा परिषद शिक्षण विभाग यांच्या संयुक्त विद्यमाने आयोजित यशवंतराव चव्हाण नाट्य स्पर्धेचा जिल्हास्तरीय पारितोषिक वितरण सोहळा ज्ञानज्योती सावित्रीबाई फुले स्मारक,  भवानी पेठ येथे चैतन्यशील वातावरणात पार पडला. यावेळी सुप्रसिद्ध राष्ट्रीय पुरस्कार प्राप्त चित्रपट दिग्दर्शक प्रतिमा जोशी कार्यक्रमाच्या प्रमुख अतिथी होत्या. 

कॅम्प एज्युकेशन सोसायटीच्या डॉ. सायरस पूनावाला  कन्या शाळेच्या सौ शाह यांच्या मार्गदर्शनाखाली ढोल ताशा लेझीम पथकाच्या  विद्यार्थिनींनी सर्व मान्यवरांचे जल्लोषात स्वागत केले. नटराजाच्या मूर्तीचे पूजन आणि दीपप्रज्वलनाने कार्यक्रमास प्रारंभ झाला. डॉ. सायरस पूनावाला  कन्याशाळेच्या शिक्षिका सौ. भोजने यांनी मार्गदर्शन केलेल्या विद्यार्थिनींनी ईशस्तवन, स्वागत गीत, राज्य गीत आणि मराठी राजभाषा दिनाचे औचित्य साधून 'लाभले आम्हास भाग्य' हे मराठी गीत सुद्धा सुरेल पणे सादर करून उपस्थितांची मने जिंकली.

प्रतिमा जोशी यांनी 'कलावंताला ग्लॅमर असते पण ते मिळवण्यासाठी त्याला अथक परिश्रम घ्यावे लागतात' हे आवर्जून नमूद केले. विद्यार्थ्यांनी रीतसर नाट्य प्रशिक्षण घेतले पाहिजे असा आग्रह त्यांनी धरला. मराठी राजभाषा दिनाचे औचित्य साधून त्यांनी कुसुमाग्रजांची  'कणा ' ही कविता प्रभावीपणे सादर केली.

रमेश चव्हाण यांनी या नाट्य स्पर्धेचे चे कौतुक केले. जग आता डिजिटल होत चाललं आहे तर शिक्षकांसाठी लघुपट निर्मिती स्पर्धा  घेण्यात यावी, अशी अभिनव कल्पना त्यांनी मांडली.

कार्यक्रमास पुणे जिल्हा परिषदेचे  मुख्य कार्यकारी अधिकारी  रमेश चव्हाण आणि जिल्हा शिक्षण व प्रशिक्षण संस्थेच्या प्राचार्या डॉ. नेहा बेलसरे, वरिष्ठ अधिव्याख्याता बाळकृष्ण वाटेकर  तसेच जिल्हा नाट्यसंयोजन समितीचे उपाध्यक्ष गिरीश भुतकर, कार्याध्यक्ष शंकर घोरपडे, सचिव प्रकाश खोत आणि इतर सर्व समन्वयक सदस्य उपस्थित होते. कार्यक्रमाचे प्रास्ताविक जिल्हा नाट्यसंयोजन समितीचे कार्याध्यक्ष शंकर घोरपडे यांनी केले.सूत्रसंचालन सौ. मीना साळुंखे यांनी तर आभार प्रदर्शन श्री बाळकृष्ण वाटेकर यांनी केले.