ज्येष्ठ नेते रामभाऊ मोझे यांचे निधन; द्रष्टा शिक्षण संस्थाचालक हरपला
गेनबा सोपानराव मोझे ट्रस्ट अंतर्गत पुण्यात शाळांसह अभियांत्रिकी महाविद्यालय, फार्मसी महाविद्यालय तसेच इतर व्यावसायिक अभ्यासक्रमाची महाविद्यालये त्यांनी उभी केली. येरवडा,बालेवाडी, वाघोली, लोहगाव यासह विविध भागात त्यांनी शिक्षण संस्थांचे जाळे पसरवले
Eduvarta
एज्युवार्ता न्यूज नेटवर्क
गेनबा सोपानराव मोझे ट्रस्टचे संस्थापक आणि काँग्रेस पक्षाचे माजी आमदार, ज्येष्ठ नेते रामभाऊ मोझे यांचे सोमवारी निधन झाले. त्यांनी पुण्यात विविध भागात शैक्षणिक संस्था सुरू करून मोठे शिक्षण क्षेत्रात योगदान दिले. त्यांच्या निधनामुळे राजकीय शैक्षणिक व सामाजिक क्षेत्रातून हळहळ व्यक्त केली जात आहे.त्यांच्या मागे पत्नी दोन, मुले, एक मुलगी, सुना, जावई, नातवंडे असा परिवार आहे.
रामभाऊ मोजे यांनी जुन्या बोपोडी विधानसभा मतदारसंघातून सलग तीन वेळा निवडणुकीमध्ये विजय मिळवत आमदार म्हणून प्रतिनिधित्व केले होते. राष्ट्रवादी काँग्रेस पक्षाची स्थापना झाल्यानंतर रामभाऊ मोझे यांनी शरद पवार यांच्या मार्गदर्शनाखाली राजकीय कारकीर्द सुरू केली होती. मात्र 2012 मध्ये पुन्हा ते काँग्रेसमध्ये दाखल झाले. पुणे महानगरपालिकेमध्ये नगरसेवक व स्थायी समितीचे अध्यक्ष म्हणूनही त्यांनी काम केले होते.
गेनबा सोपानराव मोझे ट्रस्ट अंतर्गत पुण्यात शाळांसह अभियांत्रिकी महाविद्यालय, फार्मसी महाविद्यालय तसेच इतर व्यावसायिक अभ्यासक्रमाची महाविद्यालये त्यांनी उभी केली. येरवडा,बालेवाडी, वाघोली, लोहगाव यासह विविध भागात त्यांनी शिक्षण संस्थांचे जाळे पसरवले.त्यांच्या शिक्षण संस्थांमधून हजारो विद्यार्थ्यांनी आत्तापर्यंत शिक्षण घेतले.
