SPPU विद्यापीठाच्या सहाय्यक कुलसचिवाला धमकावल्या प्रकरणी गुन्हा दाखल
राजकीय संघटनेचे पदाधिकारी राम थरकुडे यांच्यात आणि अजय ठुबे यांच्यामध्ये वाद झाला. त्यावर अजय ठुबे यांनी मला शिवीगाळ करून धमकावण्यात आले असल्याची तक्रार पोलिसांकडे दिली. त्यानुसार थरकुडे यांच्यावर गुन्हा दाखल करण्यात आला आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील सहाय्यक कुलसचिवाला धमकावल्याप्रकरणी एका संघटनेच्या पदाधिकाऱ्यावर गुन्हा दाखल करण्यात आला आहे. विद्यापीठाच्या कार्यालयात येऊन शिवीगाळ करणे व जीवे मारण्याची धमकी दिल्याने चतुश्रुंगी पोलिसांनी गुन्ह्याची नोंद केली आहे. विद्यापीठातील अधिकारी व कर्मचारी यांनी चतुश्रुंगी पोलीस स्टेशन येथे गुन्हा दाखल करण्यासाठी गर्दी केली होती. त्यानंतर पोलिसांनी सर्व प्रक्रिया पूर्ण करून गुन्हा दाखल केला आहे.
सावित्रीबाई फुले पुणे विद्यापीठाच्या सर्वसाधारण विभागात सहाय्यक कुलसचिव पदावर कार्यरत असलेले अजय ठुबे यांनी राम थरकुडे यांच्या विरोधात पोलिसांकडे तक्रार दिली.
अजय ठुबे यांच्याकडे थरकुडे यांचा माहिती अधिकाराचा अर्ज प्राप्त झाला होता. त्या अर्जावरील नमूद केलेल्या मुद्द्यानुसार सुमारे पाचशे पानांची माहिती तयार करून ठुबे यांनी माहिती अधिकार कार्यालयाकडे पाठवली होती. नियमानुसार संबंधित माहितीसाठी एक हजार रुपये भरणे आवश्यक होते. परंतु, संबंधित माहिती मला चार पानांमध्ये हवी आहे. एवढ्या पानामध्ये माहिती नको, असे थरकुडे म्हणाले.यावरून माहिती अधिकाराचा अर्ज केलेल्या राजकीय संघटनेचे पदाधिकारी राम थरकुडे यांच्यात आणि अजय ठुबे यांच्यामध्ये वाद झाला. त्यावर अजय ठुबे यांनी मला शिवीगाळ करून धमकावण्यात आले असल्याची तक्रार पोलिसांकडे दिली. त्यानुसार थरकुडे यांच्यावर गुन्हा दाखल करण्यात आला आहे.
दरम्यान, अजय ठुबे यांना धमकी दिल्यानंतर त्यांनी विद्यापीठाचे प्र. कुलसचिव व प्रकुलगुरू यांच्याकडे याबाबतची माहिती दिली होती. त्यानंतर विविध संघटनांनी एकत्र येऊन आंदोलनाचा पवित्रा घेतला होता. त्यानंतर पोलीस स्टेशन येथे जाऊन तक्रार दिली होती. पोलिसांनी सर्व माहितीची तपासणी केल्यानंतर रात्री उशिरा गुन्ह्याची नोंद झाली आहे.
