'नेट' पुन्हा ऑफलाईन झाल्याने 'सेट' परीक्षाही ऑफलाईनच होणार ? 

एज्युवार्ता न्यूज नेटवर्क 

नॅशनल टेस्टिंग एजन्सीतर्फे (NTA) गेल्या काही वर्षांपासून ऑनलाईन पध्दतीने घेतली जाणारी नेट परीक्षा (net exam)पुन्हा एकदा ऑफलाईन (offline) पध्दतीने घेतली जात आहे.येत्या जून महिन्यात होणारी नेट परीक्षा ही ऑफलाईन होणार आहे.मात्र, 'नेट'मुळे सावित्रीबाई फुले पुणे विद्यापीठाच्या सेट विभागातर्फे (Set Department of Savitribai Phule Pune University)आयोजित केली जाणारी सेट परीक्षा (set exam)सुध्दा ऑनलाईन पध्दतीने घेतली जाणार होती.आता 'नेट'च ऑफलाईन पध्दतीने घेतली जाणार असल्याने सेट परीक्षा सुध्दा ऑफलाईन पध्दतीनेच घ्यावी लागेल ,अशी चर्चा सेट परीक्षा नियोजन प्रक्रियेतील अधिकारी करत आहेत.मात्र, त्यावर अद्याप अंतिम निर्णय झाला नाही. 

विद्यापीठ अनुदान आयोगाने नेट परीक्षेबाबत अनेक मोठे बदल केले आहेत.पदवी अभ्यासक्रमाचे विद्यार्थी सुध्दा आता नेट परीक्षेला प्रविष्ट होऊ शकणार आहेत.तसेच नेट परीक्षेतील गुणांच्या आधारेच विद्यार्थ्यांना पीएच.डी.साठी प्रवेश देण्यात येणार आहे.त्यामुळे यंदा देशभरातून नेट परीक्षा देणाऱ्या विद्यार्थ्यांच्या संख्येत कमालीची वाढ होणार आहे.परिणामी सर्व विद्यार्थ्यांची ऑनालाईन परीक्षा घेणे अडचणीचे ठरू शकते.त्यामुळे एनटीएने ऑफलाईन परीक्षा घेण्याचा निर्णय घेतला असावा,असे जाणकार सांगत आहेत. 

सेट विभागाने या पुढील परीक्षा ही ऑनलाईन पध्दतीने घेतली जाईल,असे यापूर्वी सांगितले असले तरी अद्याप त्यावर शिक्कामोर्तब झालेले नाही.सध्या 7 एप्रिल रोजी झालेल्या परीक्षेचा निकाल जाहीर करण्याची तयारी सुरू आहे. मात्र,सेट विभागाच्या सुकाणू समितीच्या बैठकीत परीक्षा ऑनालाईन घ्यावी की ऑफलाईन यावर पुढील बैठकीत चर्चा केली जाणार आहे.मात्र,नेट परीक्षा पुन्हा ऑफलाईन पध्दतीने घेतली जात असेल तर सेट ऑनलाईन का घ्यावी? असा प्रश्न उपस्थित होऊ शकतो. तसेच ऑनालाईन परीक्षेसाठी विद्यापीठाला मोठी यंत्रणा उभी करावी लागणार आहे. परीक्षा ऑनालाईन घेण्याचे निश्चित झाले तर विद्यार्थ्यांना परीक्षेच्या सरावासाठी संधी उपलब्ध करून द्यावी लागेल.परिणामी सेट विभागाकडून ऑफलाईन परीक्षेचा पर्याय स्वीकारला जाण्याची अधिक शक्यता आहे.

सेट परीक्षेसाठी सुमारे एक ते सव्वा लाख विद्यार्थी अर्ज करतात.या सर्व विद्यार्थ्यांची केवळ महाराष्ट्रात नाही तर गोव्यातही परीक्षा घ्यावी लागणार आहे.त्यासाठी सेट विभागाची स्वत:ची यंत्रणा नाही.त्यामुळे सेटच्या सुकाणू समितीतील सदस्य काय निर्णय घेतात? हे पाहणे उत्सुकतेचे ठरणार आहे.
--------------------------------