UPSC च्या विश्वासार्हतेवरच प्रश्नचिन्ह ; IAS पूजा खेडकर यांची नियुक्ती वादात
ज्या प्रवर्गातून परीक्षा दिली, त्या ओबीसी प्रवर्गाचा कटऑफ ४३४ रँकपर्यंत थांबला. मात्र, तब्बल दुपटीने मागे असलेल्या पूजा खेडकर यांचा नंबर त्यात लागला आणि आयआरएस, आयएफएस नाही तर आयएएस पदावर नियुक्ती करण्यात आली.
eduvarta@gmail.com 
एज्युवार्ता न्यूज नेटवर्क
गेल्या काही दिवसांपासून देशभर चर्चेत आलेल्या आयएएस अधिकारी पुजा खेडकर (IAS Pooja Khedekar) यांच्या नियुक्तीमुळे युपीएससीच्या (UPSC) विश्वासार्हतेवर एक ना अनेक प्रश्न उपस्थित झाले आहेत. फिजीकली डिसेबल अर्थात यामध्ये दृष्टीदोष व मेंटल इलनेसची (Visual impairment and mental illness) प्रमाणपत्रे सादर करीत खेडेकर यांनी सन २०२२ मध्ये परीक्षा दिली. या परीक्षेत त्यांचा ८२१ वा रँक आला. मात्र, ज्या प्रवर्गातून परीक्षा दिली, त्या ओबीसी प्रवर्गाचा कटऑफ ४३४ रँकपर्यंत थांबला. मात्र, तब्बल दुपटीने मागे असलेल्या पूजा खेडकर यांचा नंबर लागला आणि आयआरएस, आयएफएस नाही तर आयएएस पदावर नियुक्ती करण्यात आली. अशा एक ना अनेक कारणांमुळे युपीएससीच्या विश्वासार्हतेवर प्रश्नचिन्ह उपस्थित झाले आहेत.
ओबीसी प्रवर्गातून आरक्षित जागेवरून परीक्षा द्यायचे ठरवले, तरी आरक्षणाचा लाभ घेण्यासाठी वार्षिक ८ लाखांची उत्पन्न मर्यादा असलेले प्रमाणपत्र द्यावे लागते. मग निवृत्त आयुक्त असलेल्या दिलीप खेडकर वडिलांची ४० कोटींची संपत्ती व स्वतःचे ४२ लाखांचे वार्षिक उत्पन्न असलेल्या पूजा खेडकर यांना ८ लाख रुपये वार्षिक उत्पन्नाचे नॉन क्रिमीलेअर प्रमाणपत्र मिळाले कसे ?. हे पाहाणे देखील महत्ताचे ठरणार आहे.
या व्यतिरिक्त युपीएससी देताना खेडकरांनी अंशतः अंधत्व असल्याचे सर्टिफिकेट दिले. मात्र, नंतर त्या वैद्यकीय चाचण्यांवेळी सहा वेळा गैरहजर राहिल्या. वैद्यकीय चौकशीत MRI करण्याचे प्रयत्न झाले. पण त्यालाही नकार देण्यात आला. त्यानंतर त्यांनी स्वतःच एका MRI सेंटरमधून युपीएससीला रिपोर्ट सादर केले. त्यावर युपीएससीने हरकत घेतल्यानंतर खेडकरांच्या निवडीला आव्हान दिले गेले. मिडिया रिपोर्टनुसार कॅटने पूजा खेडकर यांच्या विरोधात निकाल दिला. मात्र, त्यानंतर अचानक तेच सर्टिफिकेट ग्राह्य धरून खेडकरांची नियुक्ती वैध ठरवण्यात आली. यामागे काही राजयकीय हस्तक्षेप होता का ? असे अनेक प्रश्न या निमित्ताने चव्हाट्यावर आले आहेत.
देशात रात्रंदिवस मेहनत घेऊन गरीबांची पोरं अधिकारी होण्याचे स्वप्न बाळगत अभ्यास करतात. त्यांच्या या अभ्यासासाठी रक्ताचे पाणी करून मध्यमवर्गीय आईबाप घासातला घास बाजूला काढून त्यांच्या शिक्षणावरपैसे खर्च कररतात, मात्र त्यांच्या नशिबी निराशाच येते. त्यामुळे या प्रकरणाची वस्तूस्थिती काय आहे. हे समोर येणे आवश्यक आहे.
