राज्य परीक्षा परिषदेवर शॉर्ट हॅण्ड परीक्षा रद्द करण्याची नामुष्की; परीक्षा 28 जूनला होणार
26 जून रोजीच्या संपूर्ण दिवसाच्या परीक्षा येत्या 28 तारखेला रूपांतरित करण्यात आल्या आहेत. येत्या 28 तारखेला या विद्यार्थ्यांची परीक्षा त्याच बॅचमध्ये व त्याच वेळेमध्ये होतील.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषदेतर्फे (Maharashtra State Council Of Examination) 26 जून रोजी राज्यातील विविध परीक्षा केंद्रांवर लघुलेखन परीक्षेचे (शॉर्ट हॅण्ड) परीक्षेचे (short hand exam)आयोजन करण्यात आले होते. मात्र,काही तांत्रिक कारणामुळे ही परीक्षा रद्द (examination canceled)करून पुढे ढकलण्याची नामुष्की परीक्षा परिषदेवर आली. त्यामुळे सध्या केवळ एनटीएकडून (NTA) घेतल्या जाणाऱ्या परीक्षाच स्थगित केल्या जात नाहीत तर राज्य परीक्षा परिषदेकडून (State Council Of Examination) घेतल्या जाणाऱ्या परीक्षा सुध्दा पुढे ढकलाव्या लागत आहेत.यामुळे परीक्षा रद्दचे वारे आता महाराष्ट्रातही वाहू लागले आहे का? असा सवाल उपस्थित होत आहे.
राज्य परीक्षा परिषदेतर्फे सकाळच्या सत्रापासून शॉर्ट हॅण्ड परीक्षेचे आयोजन करण्यात आले होते. त्यासाठी विद्यार्थ्यांना ऑनलाईन लॉग इन करावे लागणार होते.परंतु,बुधवारी दोन्ही सत्रांमध्ये बऱ्याच परीक्षा केंद्रांवर लघुलेखनाची परीक्षा होऊ शकली नाही. परीक्षेसाठी सर्वरच्या काही तांत्रिक अडचणी आल्या.त्यामुळे 26 जून रोजीच्या संपूर्ण दिवसाच्या परीक्षा येत्या 28 तारखेला रूपांतरित करण्यात आल्या आहेत. येत्या 28 तारखेला या विद्यार्थ्यांची परीक्षा त्याच बॅचमध्ये व त्याच वेळेमध्ये होतील,याची नोंद घ्यावी.तसेच बुधवारी दुपारच्या तिसऱ्या व चौथ्या बॅचच्या परीक्षा घेणे योग्य होणार नाही, त्यामुळे त्या रद्द करून दिनांक 28 रोजी ठेवण्यात येत आहेत,अशी माहिती महाराष्ट्र राज्य परीक्षा परिषदेच्या अध्यक्षांतर्फे सर्व परीक्षा केंद्रांना कळवण्यात आली आहे.
परीक्षा परीषदेतर्फे लघुलेखन परीक्षा या ऑनलाईन पध्दतीने घेतल्या जातात. त्यामुळे ज्यांच्या परीक्षा लॉगिन होऊन सुरू झालेल्या आहेत, त्यांनी पुढे चालू ठेवाव्यात. तसेच 27 जून रोजीच्या मराठी लघुलेखनाच्या परीक्षा वेळेवर होतील. केवळ बुधवार दिनांक 26 जून या दिवसभरातील सत्रातील परीक्षा या 28 तारखेला पुढे ढकलण्यात येत आहेत. कृपया सर्व संस्थाचालकांनी नोंद घ्यावी. तसेच आपापल्या विद्यार्थ्यांना हा संदेश पाठवावा. तसेच बुधवारी घेतली जाणारी परीक्षा होऊ शकली नाही, याबद्दल आम्ही दिलगिरी व्यक्त करतो,असेही राज्य परीक्षा परिषदेच्या अध्यक्षांनी कळवले आहे.
-----------------------------------------------------
महाराष्ट्र राज्य परीक्षा परिषदेतर्फे घेतल्या जाणाऱ्या शॉर्ट हॅण्ड परीक्षा काही तांत्रिक कारणांमुळे बुधवारी होऊ शकल्या नाही.मात्र, 26 जून रोजीच्या परीक्षा पुढे ढकलण्यात आल्या असून आता या परीक्षा 28 जून रोजी घेतल्या जाणार आहेत. - अनुराधा ओक, आयुक्त, महाराष्ट्र परीक्षा परिषद, पुणे
---------------------------------------
