दहावीचा मराठीचा पेपर जालन्यात फुटला ? उत्तर पत्रिकेच्या झेरॉक्स आल्या बाहेर...

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे (Maharashtra State Board of Secondary and Higher Secondary Education) घेतल्या जाणाऱ्या इयत्ता दहावीच्या परीक्षेला (10th exams) आजपासून (दि.२१) सुरुवात झाली. मात्र, परीक्षेच्या पहिल्याच दिवशी मराठी विषयाचा पेपर फुटल्याची (Marathi subject paper broke) माहिती समोर आली आहे. जालना जिल्ह्यातील एका परीक्षा केंद्रावर पेपर फुटला असल्याचे बोलले जात आहे. मात्र, अद्याप यासंदर्भातील अधिकृत माहिती बोर्डाकडून समोर आलेली नाही. शिक्षण विभागातर्फे या संदर्भातील सखोल माहिती घेण्याचे काम सुरू आहे.

जालना जिल्ह्यातील मंठा तालुक्यातील काही ठिकाणी दहावीच्या मराठी विषयांच्या उत्तरपत्रिकेच्या छायांकित प्रति वाटल्या जात असल्याचे वृत्त एक वृत्तवाहिनीने प्रसिद्ध केले. त्यानंतर छत्रपती संभाजीनगर येथील विभागीय शिक्षण मंडळ कार्यालयाने संबंधित शिक्षणाधिकाऱ्यांकडून या संदर्भातील अहवाल मागविला आहे.

मराठी विषयाची परीक्षा सुरू झाल्यानंतर सुमारे पंधरा मिनिटातच उत्तरपत्रिकेची छायांकित प्रत बाहेर पडल्याचे बोलले जात आहे. विभागातर्फे कॉपीमुक्त अभियान राबविले जात असताना अशा प्रकारच्या घटना समोर आल्याने आश्चर्य व्यक्त केले जात आहे. त्यातच इयत्ता बारावीच्या परीक्षेला सर्वाधिक गैरप्रकार छत्रपती संभाजीनगर विभागात होत असल्याचे आढळून आले आहे. त्यामुळे दहावीच्या पेपरला सुद्धा असेच प्रकार होणार आहेत का? असा प्रश्न उपस्थित होत आहे.दरम्यान, बोर्डाच्या अधिकाऱ्यांकडून याबाबतची अधिकृत माहिती घेण्याचा प्रयत्न केला असता संपर्क होऊ शकला नाही. 

दरम्यान, जालन्यात दहावीचा मराठीचा पेपर फुटला नसल्याचे जिल्हाधिकारी यांच्याकडून सांगितले जात आहे.तसेच या ठिकाणी सापडलेली उत्तरपत्रिका ही संभाव्य प्रश्नपत्रिका असल्याचे प्रशासनाकडून सांगितले जात आहे.तसेच प्रशासनाकडून या प्रकरणाची अधिक माहिती घेतली जात आहे.