एक वर्षाचा बी.एड अभ्यासक्रम पुन्हा सुरू होणार, पण 'हे' नियम होतील लागू 

एज्युवार्ता न्यूज नेटवर्क

अध्यापन क्षेत्रात सामील होण्याचा विचार करणाऱ्यांसाठी एक आनंदाची बातमी आहे. आता उमेदवारांना बी.एड करण्यासाठी दीर्घ कोर्स करावा लागणार नाही, तर इच्छुक उमेदवार फक्त एका वर्षात बी.एड पूर्ण करू शकतात. पुन्हा पूर्वीप्रमाणे एक वर्षाचा बी.एड.अभ्यासक्रम सुरू करण्याची योजना आखण्यात आली आहे. फक्त यावेळी काही अटी लागू केल्या जातील. राष्ट्रीय शिक्षक शिक्षण परिषदेने (NCTE) या प्रस्तावाला मान्यता दिली आहे.

एनसीटीईचे अध्यक्ष प्रा. पंकज अरोरा म्हणाले की, "नियामक मंडळाचे नवीन नियम-२०२५ आणण्यासही मान्यता देण्यात आली आहे. हे नवीन नियम २०१४ च्या नियमांची जागा घेतील. एक वर्षाचा बी.एड.अभ्यासक्रम चार वर्षांचा पदवीधर अभ्यासक्रम पूर्ण केलेल्या किंवा पदव्युत्तर शिक्षणानंतर या अभ्यासक्रमासाठी पात्र असलेल्या विद्यार्थ्यांसाठी खुला असेल. गेल्या शनिवारी झालेल्या राष्ट्रीय शिक्षक शिक्षण परिषदेच्या (एनसीटीई) नियामक मंडळाच्या बैठकीत, एक वर्षाच्या बी.एड.सह अध्यापन अभ्यासक्रमांबाबत अनेक महत्त्वाचे निर्णय घेण्यात आले आहेत"

प्रा. पंकज अरोरा यांच्या मते, '४ वर्षांचा एकात्मिक शिक्षक शिक्षण कार्यक्रम (ITEP) सध्या भारतातील ६४ शैक्षणिक संस्थांमध्ये सुरू आहे. जिथे विद्यार्थी त्यांच्या आवडीच्या विषयात बी.एड करतात. आता आयटीईपी योग शिक्षण, आयटीईपी शारीरिक शिक्षण, आयटीईपी संस्कृत, आयटीईपी परफॉर्मिंग आर्ट्स एज्युकेशन यासारखे विशेष प्रवाह जोडले जातील. आयटीईपी ही चार वर्षांची ड्युअल इंटिग्रेटेड ग्रॅज्युएशन डिग्री आहे, जी सध्या बीए-बीएड, बी.कॉम-बीएड आणि बीएससी-बीएड मध्ये दिली जाते.