CET CELL : बनावट कागदपत्रे सादर केल्यास प्रवेश रद्द; विद्यार्थ्यांवर कायदेशीर कारवाई
आरक्षणाचा लाभ मिळविण्यासाठी सादर करण्यात आलेली कागदपत्रे तपासणीदरम्यान किंवा कोणत्याही स्तरावरील पडताळणीत खोटी, बनावट किंवा दिशाभूल करणारी असल्याचे निदर्शनास आल्यास संबंधित विद्यार्थ्याचा प्रवेश तत्काळ रद्द केला जाईल.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) सेलमार्फत शैक्षणिक वर्ष २०२६-२७ साठी विविध व्यावसायिक पदवी व पदव्युत्तर अभ्यासक्रमांच्या केंद्रीभूत प्रवेश प्रक्रिया सुरू आहेत. या प्रवेश प्रक्रियेदरम्यान किंवा त्यानंतरच्या पडताळणीत विद्यार्थ्यांनी सादर केलेली कागदपत्रे चुकीची, खोटी, बनावट अथवा दिशाभूल करणारी आढळल्यास संबंधित विद्यार्थ्याचा प्रवेश तात्काळ रद्द करण्यात येईल. तसेच संबंधित विद्यार्थ्याविरुद्ध प्रचलित नियमांनुसार आवश्यक ती कायदेशीर कारवाई केली जाईल, असा इशारा सीईटी सेलने दिला आहे.
सीईटी सेलने यासंदर्भातील स्पष्ट निर्देश राज्यातील सर्व प्रवेश देणाऱ्या संस्थांना दिले आहेत. प्रवेश प्रक्रियेदरम्यान विद्यार्थ्यांनी अनाथ (Orphan), संरक्षण दल (Defence), दिव्यांग (PwD) आणि अल्पसंख्याक (Minority) आदी विविध आरक्षण प्रवर्गांचा लाभ मिळविण्यासाठी आवश्यक कागदपत्रे ऑनलाइन अर्जासोबत अपलोड केली आहेत. या कागदपत्रांच्या आधारे गुणवत्ता यादी तयार करून महाविद्यालयांमध्ये जागांचे वाटप करण्यात येत आहे.
आरक्षणाचा लाभ मिळविण्यासाठी सादर करण्यात आलेली कागदपत्रे तपासणीदरम्यान किंवा कोणत्याही स्तरावरील पडताळणीत खोटी, बनावट किंवा दिशाभूल करणारी असल्याचे निदर्शनास आल्यास संबंधित विद्यार्थ्याचा प्रवेश तत्काळ रद्द केला जाईल. त्याचबरोबर संबंधित विद्यार्थ्याविरुद्ध कायदेशीर कारवाईची प्रक्रियाही राबविण्यात येणार असल्याचे सीईटी सेलने स्पष्ट केले आहे.
दरम्यान, प्रवेश निश्चित करण्यापूर्वी संबंधित विद्यार्थ्यांच्या सर्व मूळ कागदपत्रांची प्रत्यक्ष पडताळणी करणे संबंधित महाविद्यालये व संस्थांसाठी बंधनकारक करण्यात आले आहे. योग्य पडताळणी न करता प्रवेश निश्चित केल्याचे आढळल्यास संबंधित संस्थेविरुद्धही प्रचलित नियमांनुसार कायदेशीर कारवाई करण्यात येईल, असे निर्देश सीईटी सेलने दिले आहेत.
विद्यार्थी तसेच प्रवेश देणाऱ्या सर्व संस्थांनी प्रवेश प्रक्रियेत पारदर्शकता राखत सीईटी सेलच्या निर्देशांचे काटेकोर पालन करावे, असे आवाहनही सीईटी सेलतर्फे करण्यात आले आहे.
