पुणे विद्यापीठात प्रवेशासाठी ऑनलाईन अर्ज भरला का? इथे वाचा सविस्तर माहिती
विद्यापीठांमधील विविध विभाग तसेच सेंटरमध्ये पदव्युतर पदवी व पदविका, पदवी, आंतरविद्याशाखीय पदविका अभ्यासक्रम घेतले जातात. या अभ्यासक्रमांमध्ये प्रवेशासाठी प्रवेश परीक्षा घेतली जाणार आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठातील (SPPU) विविध पदव्युत्तर, पदवी तसेच आंतरविद्याशाखीय अभ्यासक्रमांमध्ये प्रवेशासाठी ऑनलाईन प्रवेश परीक्षा (Online Admission Examination) घेतली जाणार आहे. त्यासाठी ऑनलाईन अर्ज भरण्याची प्रक्रिया सुरू आहे. पदवी अभ्यासक्रमांसाठी (Degree Courses) अर्ज करण्याची मुदत १० जून तर पदव्युतर पदवी अभ्यासक्रमांसाठी (PG Degree) ही मुदत १७ जूनपर्यंत आहे. ही परीक्षा अनुक्रमे २४ जून व २२ जुलै रोजी होणार आहे.
विद्यापीठांमधील विविध विभाग तसेच सेंटरमध्ये पदव्युतर पदवी व पदविका, पदवी, आंतरविद्याशाखीय पदविका अभ्यासक्रम घेतले जातात. या अभ्यासक्रमांमध्ये प्रवेशासाठी प्रवेश परीक्षा घेतली जाणार आहे. परीक्षेतील गुणवत्तेच्याआधारेच अभ्यासक्रमांमध्ये प्रवेश दिला जाणार आहे. ही परीक्षआ बहुपर्यायी स्वरुपाची शंभर गुणांची असेल.
हेही वाचा : डॉ. कारभारी काळे ठरले सर्वाधिक एक वर्षाचा काळ मिळालेले पहिले प्रभारी कुलगुरू
परीक्षेसाठी निगेटिव्ह मार्किंग पध्दत असल्याने प्रत्येक चुकीच्या उत्तरामध्ये मिळालेल्या गुणांच्या एक चुतर्थांश गुण कमी होतील. ऑनलाईन अर्ज भरण्याची मुदत पदवीसाठी १० जून आणि पदव्युतरसाठी १७ जून असली तरी विलंब शुल्क भरूनही अर्ज करता येणार आहे. त्यासाठी अनुक्रमे १७ जून व ८ जुलैपर्यंत मुदत देण्यात आली आहे. परीक्षेच्या संभाव्य तारखा अनुक्रमे २४ जून व २२ जुलै या आहेत. अभ्यासक्रमाच्या उपलब्ध प्रवेश क्षमतेपेक्षा कमी अर्ज आल्यास परीक्षा रद्द करून थेट प्रवेश दिले जाऊ शकतात.
ऑनलाईन अर्ज भरताना विद्यार्थ्यांना सर्व आवश्यक कागदपत्रे अपलोड करावी लागणार आहेत. ही कागदपत्रे किंवा अर्जाची प्रिंट आऊट विद्यापीठात सादर करावी लागणार नाही. मात्र, प्रवेश निश्चित झाल्यानंतर संबंधित विभागात सर्व मुळ कागदपत्रे सादर करावी लागतील. आवश्यक कागदपत्रे अपलोड न केल्यास अर्ज ग्राह्य धरला जाणार नाही. त्यामुळे संबंधित विद्यार्थ्यांना परीक्षेला मुकावे लागेल. गुणवत्ता यादीत नाव आले म्हणजे प्रवेश निश्चित झाला, असे होणार नाही. त्यासाठी सर्व आवश्यक कागदपत्रे सादर करावी लागणार असल्याचे विद्यापीठाकडून स्पष्ट करण्यात आले आहे.
ऑनलाईन अर्ज भरण्यासाठी संकेतस्थळ : https://campus.unipune.ac.in/CCEP/Login.aspx
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
