पुणे विद्यापीठात पाली भवनचा मार्ग मोकळा

एज्युवार्ता न्यूज नेटवर्क

सावित्रीबाई फुले पुणे विद्यापीठात (SPPU) पाली भवन उभारण्याचा मार्ग मोकळा झाला आहे. पाली विभागाची (Pali Bhavan) स्वतंत्र इमारत विद्यापीठात समाज कल्याण विभागाच्या (Social Justice Department) निधीतून उपलब्ध होणार आहे. त्यासाठी सुमारे १३ कोटी रुपये खर्च अपेक्षित आहे. त्या संदर्भात डॉ. बाबासाहेब आंबेडकर (Dr. Babasaheb Ambedkar) यांच्या जयंतीदिनी समाजकल्याण विभाग व विद्यापीठामध्ये करार करण्यात आला.

शिक्षणविषयक ताज्या बातम्यांसाठी येथे क्लिक करा. http://eduvarta.com/

समाज कल्याण विभागाच्या वतीने प्रादेशिक उपायुक्त बाळासाहेब सोळंकी व विद्यापीठाचे कुलसचिव प्रफुल्ल पवार यांनी करारावर स्वाक्षरी केली. अनुसूचित जाती व नवबौध्द घटकातील मान्यवर व्यक्तींचे स्मारक बांधणे तसेच अनुसूचित जातीसाठी सांस्कृतिक व ऐतिहासिक दृष्ट्या महत्व असलेल्या स्थळांचा विकास करणे, अनुसूचित जातीच्या सांस्कृतिक व नीतिमूल्यांवर आधारित विकास साधणाऱ्या प्रकल्पांसाठी स्वयंसेवी संस्थाना अनुदान मंजूर करणे या यांजनेंतर्गत पाली भवन उभारण्यास मान्यता देण्यात आली आहे.

पाली भवनसाठी एकूण १३ कोटी ३४ लाख ७५ हजार रुपयांची निधी उपलब्ध करून दिला जाणार आहे. या बांधकामांमध्ये शासनाचा ९० टक्के हिस्सा असुन विद्यापीठचा दहा टक्के हिस्सा राहील. पाली भाषेच्या तसेच विद्यापीठाअंतर्गत इतर विभागांच्या शैक्षणिक उपक्रमांसाठीही इमारतीचा वापर विद्यापीठात करता येणार आहे. माजी आमदार गौतम चाबुकस्वार यांनी पाली भवन उभारण्यासंदर्भात शासनाकडे पाठपुरावा केला होता.

राज्याच्या समाज कल्याण विभागाकडून यासंबंधी निधी उपलब्ध करून दिल्याबद्दल विद्यापीठाच्या वतीने राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, समाज कल्याण विभागाचे सचिव सुमंत भांगे व आयुक्त डॉ. प्रशांत नारनवरे,  माजी आमदार गौतम चाबुकस्वार यांचे आभार व्यक्त करण्यात आले आहे.