पुण्यात नीट पेपरफुटीविरोधात NSUI-SIO चे 'मुरमुरे बेचो' आंदोलन; शिक्षणमंत्र्यांच्या राजीनाम्याची मागणी
आंदोलन उग्र झाल्याने पोलिसांनी अनेक एनएसयूआय आणि एसआयओ कार्यकर्त्यांना ताब्यात घेतले. कायदा व सुव्यवस्था राखण्यासाठी ही कारवाई करण्यात आल्याचे पोलिसांनी सांगितले.
eduvarta@gmail.com 
एज्युवार्ता न्यूज नेटवर्क
नीट-युटी २०२६ (NEET-UG 2026) परीक्षेतील कथित पेपर फुटी प्रकरणी (NEET paper leak case) पुण्यात नॅशनल स्टुडंट्स युनियन ऑफ इंडिया (NSUI), स्टुडंट्स इस्लामिक ऑर्गनायझेशन (SIO) आणि इतर विद्यार्थी संघटनांनी जोरदार निदर्शने (Vigorous Protests in Pune) केली. गूडलक चौकात विद्यार्थ्यांनी आगळेवेगळे ‘मुरमुरे बेचो’ आंदोलन केले. “नीटची तयारी सोडा, मुरमुरे विका” असे फलक आणि घोषणा देत एनटीएने (NTA) विद्यार्थ्यांच्या भविष्याचा सौदा केल्याचा तीव्र निषेध व्यक्त करण्यात आला.
मॉडर्न कॉलेज आणि डेक्कन परिसरातही आंदोलकांनी ‘चिट्ठे चोर’, ‘एनटीए बरखास्त करा’, ‘डॉक्टरची डिग्री विक्रीसाठी नाही’ अशा घोषणा देत केंद्र सरकार आणि एनटीए विरुद्ध रोष व्यक्त केला. विद्यार्थ्यांच्या भविष्याशी खेळ केल्याचा आरोप करत आंदोलकांनी एनटीएच्या कारभारावर ताशेरे ओढले. पेपर फुटीमुळे २२ लाखांहून अधिक विद्यार्थ्यांचे एक वर्ष वाया गेल्याचे आणि मानसिक तणाव वाढल्याचे मत या आंदोलनकर्त्यांनी व्यक्त केले.
आंदोलन उग्र झाल्याने पोलिसांनी अनेक एनएसयूआय आणि एसआयओ कार्यकर्त्यांना ताब्यात घेतले. कायदा व सुव्यवस्था राखण्यासाठी ही कारवाई करण्यात आल्याचे पोलिसांनी सांगितले. केंद्र सरकारने नीट-युटी २०२६ परीक्षा रद्द करून २१ जून २०२६ रोजी फेरपरीक्षा घेण्याची घोषणा केली आहे. मात्र, या निर्णयानंतरही विद्यार्थ्यांचे मानसिक खच्चीकरण, शैक्षणिक नुकसान आणि पुन्हा तयारीचा खर्च याबाबत तीव्र नाराजी व्यक्त होत आहे. एनएसयूआयने ही मोहीम देशव्यापी “एनटीए हल्ला बोल” अंतर्गत राबवली असून, दिल्लीतील एनटीए मुख्यालयाबाहेरही मोठे प्रदर्शन झाले.
विद्यार्थी संघटनांनी एनटीएच्या बरखास्ती, शिक्षणमंत्री धर्मेंद्र प्रधान यांच्या राजीनाम्याची आणि दोषींवर कठोर कारवाईची मागणी केली आहे. सीबीआयने लातूरच्या कोचिंगशी संबंधित तपास सुरू केला असून, आरसीसी कोचिंगचे संस्थापक शिवराज मोटेगावकर याला अटक केली आहे. या प्रकरणाने कोचिंग उद्योग, परीक्षा पद्धती आणि एनटीएच्या विश्वासार्हतेवर प्रश्नचिन्ह उभे केले आहे.
