बालभारतीकडून चौथीच्या गणिताच्या पुस्तकातील चुकांची कबुली

एज्युवार्ता न्यूज नेटवर्क 

महाराष्ट्र राज्य पाठ्यपुस्तक निर्मिती व अभ्यासक्रम संशोधन मंडळाने (बालभारती) इयत्ता चौथीच्या गणिताच्या पाठ्यपुस्तकात झालेल्या गंभीर चुका अखेर अधिकृतपणे कबूल केल्या आहेत. थोर भारतीय गणिततज्ज्ञ श्रीनिवास रामानुजन यांच्या निधनाची तारीख चुकीची छापण्यासोबतच मराठी व इंग्रजी माध्यमाच्या पुस्तकांमध्ये मोठे मुद्रणदोष (Printing errors) झाले आहेत. यावर बालभारतीने अधिकृत खुलासा जारी केला असून, विद्यार्थ्यांचा संभ्रम दूर करण्यासाठी पुस्तकातील QR Code वर व्हिडिओद्वारे दुरुस्ती अपलोड केली जात असल्याचे स्पष्ट केले आहे.

इयत्ता चौथीचे गणिताचे पुस्तक एकूण १० माध्यमांमध्ये छापण्यात येते, त्यापैकी प्रामुख्याने मराठी आणि इंग्रजी माध्यमाच्या पुस्तकांमध्ये या चुका समोर आल्या आहेत.

श्रीनिवास रामानुजन यांच्या निधनाची तारीख चुकली

पाठ्यपुस्तकातील पृष्ठ क्रमांक १०९ वर थोर भारतीय गणिततज्ज्ञ श्रीनिवास रामानुजन यांच्या निधनाची तारीख '२७ एप्रिल १९२०' अशी चुकीची छापली गेली आहे. वास्तविक पाहता, त्यांची अचूक निधनाची तारीख  २६ एप्रिल १९२० अशी आहे. पुढील आवृत्तीत हा दोष सुधारला जाईल.

मराठी माध्यम (पृष्ठ क्र. ५५) - ग्रॅम ऐवजी 'किलोग्रॅम' हवे

मराठी माध्यमाच्या पुस्तकात पान नंबर ५५ वरील स्वाध्यायात 'जोड्या लावा' या प्रश्नात 'ब' गटात ६ व्या क्रमांकापुढे १००० ग्रॅम पेक्षा जास्त' असे छापून आले आहे. तिथे '१००० किलोग्रॅम पेक्षा जास्त' असे असायला हवे होते. ही चूक केवळ मराठी माध्यमात झाली आहे.

इंग्रजी माध्यम (पृष्ठ क्र. ७७) - चलनाचे चुकीचे मुद्रण 

इंग्रजी माध्यमाच्या पुस्तकात पान नंबर ७७ वर खालून चौथ्या ओळीत फक्त of छापले आहे, तिथे 'of ₹1.' असे हवे होते. तसेच खालून तिसऱ्या ओळीत '₹1.49 rupees' असे छापले गेले आहे, तिथे  '49 rupees' असे असायला हवे होते.

QR Code स्कॅन करताच दिसणार दुरुस्तीचा व्हिडिओ 

नवीन शैक्षणिक वर्षाची पुस्तके आधीच छापून विद्यार्थ्यांपर्यंत पोहोचली असल्यामुळे बालभारतीने यावर डिजिटल तोडगा काढला आहे. या सर्व चुका आणि त्यावरील सुधारित बदलांची माहिती देणारा एक विशेष स्पष्टीकरणाचा व्हिडिओ तयार करून तो पुस्तकातील QR Code मध्ये तातडीने अपलोड केला जात आहे. त्यामुळे शिक्षक आणि विद्यार्थ्यांना मोबाईलद्वारे हा कोड स्कॅन करून योग्य माहिती लगेच पाहता येईल,असे बालभारतीच्या संचालिका अनुराधा ओक यांनी कळवले आहे.