उद्या नागरी सेवा संयुक्त पूर्वपरीक्षा, प्रशासनाची तयारी पूर्ण  

एज्युवार्ता न्यूज नेटवर्क 

महाराष्ट्र लोकसेवा आयोगाकडून (MPSC) उद्या दि. १ डिसेंबर रोजी महाराष्ट्र राजपत्रित नागरी सेवा संयुक्त पूर्वपरीक्षा २०२४ (Civil Services Combined Preliminary Examination 2024) राज्यातील विविध परीक्षा केंद्रावर  घेण्यात येणार आहे. त्यासाठी प्रशासनाची संपूर्ण तयारी झाली आहे. परीक्षा सुरळीत पार पाडण्यासाठी परीक्षा केंद्राच्या १०० मीटर परिसरात सकाळी ८ ते सायंकाळी ६ वाजेपर्यंत भारतीय नागरिक सुरक्षा संहिता २०२३ चे कलम १६३ अन्वये निर्बंध लागू करण्याचा आदेश जिल्हा प्रशासनाकडून देण्यात आले आहेत. 

प्रसिद्ध करण्यात आलेल्या  १ डिसेंबर २०२४ रोजी परीक्षा केंद्राच्या ठिकाणी १०० मीटर परिसरात सकाळी ८ ते सायंकाळी ६ वाजेपर्यंत परीक्षार्थी व्यतिरिक्त २ किंवा त्यापेक्षा अधिक व्यक्ती एकत्रित जमा होणार नाहीत. परिसरात नियमित व रोजचे वाहतूकव्यतिरिक्त इतर कोणत्याही हालचालींना प्रतिबंध घालण्यात येणार आहेत. झेरॉक्स, फॅक्स, एस.टी.डी. बूथ, पेजर, मोबाइल फोन, ई-मेल, इंटरनेट सवलती किंवा इतर कोणत्याही कॉम्युनिकेशन सवलतींवर प्रतिबंध घालण्यात आला आहे. आदेशाचे उल्लंघन केल्यास संबंधित व्यक्तीविरुद्ध कायद्यातील तरतुदीनुसार कारवाई करण्यात येईल, असे प्रशासनाकडून आदेशात नमूद करण्यात आले आहे.

परीक्षेच्या दिवशी ऐनवेळी उद्भवू शकणाऱ्या अडचणी लक्षात घेऊन परीक्षा सुरू होण्याच्या वेळेपूर्वी किमान दीड तास आधी संबंधित परीक्षा उपकेंद्रावर उपस्थित राहावे. तसेच प्रत्यक्ष परीक्षा सुरू होण्याच्या वेळेपूर्वी अर्धा तास आधी परीक्षा कक्षातील स्वतःच्या बैठक क्रमांकावर उपस्थित राहणे अनिवार्य आहे. त्याशिवाय परीक्षेस प्रवेश दिला जाणार नाही. तसेच परीक्षेवेळी एमपीएससीच्या मार्गदर्शक सूचनांचे उमेदवारांनी पालन करणे अनिवार्य आहे.