मराठी विषय घेऊ न दिल्याने विद्यार्थ्याने सगळेच काढले..

एज्युवार्ता न्यूज नेटवर्क 

सावित्रीबाई फुले पुणे विद्यापीठाशी (Savitribai Phule Pune University) संलग्न असलेल्या शिक्रापूर येथील कस्तुरी संस्थेचे महाविद्यालय (Kasturi Sanstha College Shikrapur) मागील काही महिन्यांपासून वादाच्या भोवऱ्यात सापडले आहे. त्यानंतर आता येथे शिक्षण घेणार्‍या एक विद्यार्थ्याचा व्हीडीओ सोशल मिडियावर (Social media Viral Vidio) व्हायरल झाला आहे. त्याने महाविद्यालयासह प्राध्यापकांवर सनसनाटी आरोप केले आहेत. त्याने एक ना अनेक समस्यांचा पाढाच वाचला आहे. तसेच या समस्या लवकरात लवकर मार्गी न लागल्यास आणि मी मा‍झ्या जिवाचे काही बरे वाईट केल्यास त्याला विद्यापीठ आणि महाविद्यालय जबाबदार असेल, असा इशारा या विद्यार्थ्याने दिला आहे. 

व्हायरल व्हिडिओ मध्ये दीपक सिंग म्हणाला, प्रवेश घेताना विद्यार्थ्यांना सांगण्यात आले या महाविद्यालयात मराठी विषय उपलब्ध आहे. मात्र, परीक्षा अर्ज भरण्याची वेळ आल्यावर मराठी विषय कोणीही निवडू नये असे सांगीतले गेले. जे कोणी मराठी विषय घेईल त्यांचे शैक्षणिक नुकसान होईल, आणि त्यासाठी विद्यार्थी स्वत: जबाबदार राहतील. विद्यापीठाकडून मराठी विषय बंद करण्यात आला आहे, असे प्राध्यापकांकडून विद्यार्थ्यांना सांगण्यात आले. विद्यार्थ्यांकडून सर्व शैक्षणिक शुल्क वसूल करण्यात आला. मात्र, महाविद्यालयात पाणी, स्वच्छतागृह, विविध विषयांचे प्राध्यापक अशा काहीही सुविधा उपलब्ध नाहीत. शिवाय या महाविद्यालयात तासिका देखील घेतल्या जात नाहीत,असेही या व्हिडिओ मध्ये म्हटले आहे.

महाविद्यालयाने मराठी विषयाची निवड न करू दिल्याने बीए द्वितीय वर्षांच्या सर्व विद्यार्थ्यांनी विद्यापीठाला पत्र लिहून त्यावर विचारण केली. त्यानंतर महाविद्यालयाकडून परीक्षा काळात विद्यार्थ्यांना जाणून बुजून त्रास देण्यास सुरुवात केली. काॅपी न करता पेपर हिसकून घेणे, वेळेच्या अगोदर पेपर जमा करणे, प्रात्यक्षिक परीक्षांत मार्क कमी देणे, घरी पालकांना फोन करून अव्वाच्या सव्वा माहिती देणे यासारखा त्रास महाविद्यालयाकडून विद्यार्थ्यांना दिला जात आहे,असंही आरोप या विद्यार्थ्याने केला आहे.

पुढील काळात मी या महाविद्यालयात परीक्षा देऊ शकत नाही. त्यामुळे माझा प्रवेश आणि परीक्षा अन्य महाविद्यालयात स्थलांतरित करावी. असे नाही न झाल्यास मी माझ्या जीवाचे काही केल्यास त्यासाठी विद्यापीठ आणि महाविद्यालय जबाबदार राहील,  असे दीपक सिंग या विद्यार्थ्यांने व्हायरल व्हिडीओमध्ये म्हटले आहे. त्यामुळे पुढील काळात विद्यापीठ प्रशासन महाविद्यालयावर काय कारवाई करणार आणि पीडित विद्यार्थ्याला कशा प्रकारे न्याय मिळवून दिला जाणार हे पाहाणे महत्त्वाचे ठरणार आहे. 
_________________________________

विद्यार्थ्यांना मराठी विषय घेऊ न देता विभागच बंद पाडण्याचा कट रचून मराठीची गळचेपी करणाऱ्या महाविद्यालयाला आणि त्यांना पाठीशी घालणाऱ्या चौकशी समितीवर लवकरात लवकर कारवाई करावी, अन्यथा गाठ आमच्याशी आहे.या बाबतचे पत्र विद्यापीठ प्रशासनाला दिले आहे. यावर कारवाई न झाल्यास युवासेनेतर्फे  आंदोलन उभे केले जाईल. 

- कल्पेश यादव, युवासेना,  सह-सचिव