महाडीबीटी २.० वर मॅट्रिकपूर्व व मॅट्रिकोत्तर शिष्यवृत्ती अर्ज सुरू 

एज्युवार्ता न्यूज नेटवर्क 

महाराष्ट्र शासनाच्या सामाजिक न्याय व विशेष सहाय्य विभागाने शैक्षणिक वर्ष २०२६-२७ (MahaDBT Scholarship 2026-27) साठी अनुसूचित जाती (Scheduled Caste Scholarship) प्रवर्गातील विद्यार्थ्यांसाठी महाडीबीटी २.० (MahaDBT 2.0 Application) प्रणालीवर मॅट्रिकपूर्व आणि मॅट्रिकोत्तर शिष्यवृत्ती (Pre-matriculation scholarship) योजनांचे ऑनलाइन अर्ज भरण्याची प्रक्रिया सुरू केली आहे. समाज कल्याण आयुक्तालय, पुणे यांच्या वतीने विद्यार्थ्यांना अचूक माहिती देण्याचे आवाहन केले आहे. शिष्यवृत्तीची रक्कम थेट विद्यार्थ्यांच्या आधार-संलग्न बँक खात्यात जमा होणार असल्याने अर्ज प्रक्रियेत काळजीपूर्वक माहिती भरावी, असे स्पष्ट करण्यात आले आहे. 

या योजनांमध्ये भारत सरकार मॅट्रिकोत्तर शिष्यवृत्ती, मागासवर्गीय विद्यार्थ्यांच्या शिक्षण व परीक्षा शुल्क प्रतिपूर्ती, राजर्षी छत्रपती शाहू महाराज गुणवत्ता शिष्यवृत्ती, व्यावसायिक अभ्यासक्रमाशी संलग्न वसतिगृहातील निर्वाह भत्ता आणि शासकीय व खाजगी आयटीआय विद्यार्थ्यांसाठी व्यवसाय प्रशिक्षण शुल्क प्रतिपूर्ती यांचा समावेश आहे. मॅट्रिकपूर्व योजनांत इयत्ता ५ वी ते १० वी पर्यंतच्या विद्यार्थ्यांसाठी भारत सरकार मॅट्रिकपूर्व शिष्यवृत्ती, साफसफाई क्षेत्रातील पालकांच्या मुलांसाठी विशेष शिष्यवृत्ती, सावित्रीबाई फुले शिष्यवृत्ती, मागासवर्गीय विद्यार्थ्यांसाठी माध्यमिक शाळा शिष्यवृत्ती, महर्षी विठ्ठल रामजी शिंदे शुल्क योजना आणि सैनिक शाळेतील विद्यार्थ्यांसाठी निर्वाह भत्ता यांचा लाभ उपलब्ध आहे. 

अर्ज प्रक्रियेसाठी सर्व विद्यार्थ्यांना नवीन महाआयडी तयार करणे अनिवार्य आहे. जुने युजर आयडी किंवा पासवर्ड यापुढे कामी येणार नाहीत. आधार क्रमांकाद्वारे नोंदणी करून पत्ता, मोबाईल, ईमेल आणि बँक खाते अपडेट करावे. जाती प्रमाणपत्र, उत्पन्न प्रमाणपत्र, अधिवास प्रमाणपत्र आणि शैक्षणिक गुणपत्रके यासारखी सर्व दस्तऐवज स्पष्ट PDF स्वरूपात अपलोड करणे आवश्यक आहे.

नवीन अर्ज आणि नूतनीकरण दोन्हीसाठी नवीन महाआयडी किंवा आधार लॉगिन अनिवार्य राहील. महाविद्यालये आणि शाळांसाठी महत्त्वाचे निर्देश जारी करण्यात आले आहेत. आता केवळ प्राचार्य लॉगिन उपलब्ध असून लिपीक लॉगिन बंद केले आहे. पात्र विद्यार्थ्यांचे अर्ज कोणत्याही परिस्थितीत प्रलंबित न ठेवता वेळेत मंजूर करून पुढे पाठविण्याची पूर्ण जबाबदारी प्राचार्यांवर आहे. तसेच प्रवेशाच्या वेळी अनुसूचित जातीच्या पात्र विद्यार्थ्यांकडून शिक्षण किंवा परीक्षा शुल्क घेण्यात येऊ नये, असे स्पष्ट आदेश देण्यात आले आहेत. 

या उपक्रमामुळे अनुसूचित जाती समाजातील विद्यार्थ्यांना शिक्षणाच्या संधी समानतेने उपलब्ध होणार असून आर्थिक अडचणींमुळे शिक्षणात व्यत्यय येणार नाही. विभागाने विद्यार्थ्यांना लवकरात लवकर अर्ज भरण्याचे आवाहन केले आहे. अधिक माहितीसाठी महाडीबीटी २.० वेबसाइटला भेट द्यावी असे सांगण्यात आले आहे.