आरोग्य विज्ञान विद्यापीठाच्या कुलगुरूपदी डॉ. व्यंकट गिते यांची नियुक्ती
शासकीय आरोग्य व्यवस्थेत कॅडव्हर किडनी प्रत्यारोपण (Cadaver Renal Transplant) कार्यक्रम सुरू करण्यात डॉ. गिते यांचे महत्त्वपूर्ण योगदान राहिले आहे. तसेच महाराष्ट्र शासनाच्या आरोग्य विभागाच्या अवयव प्रत्यारोपण कार्यक्रमाचे ते सल्लागार सदस्य म्हणूनही कार्यरत आहेत.
Eduvarta
एज्युवार्ता न्यूज नेटवर्क
नाशिक येथील महाराष्ट्र आरोग्य विज्ञान विद्यापीठाच्या (MUHS) कुलगुरूपदी शासकीय वैद्यकीय महाविद्यालय, नाशिकचे अधिष्ठाता डॉ. व्यंकट शाहुबाई अर्जुनराव गिते यांची नियुक्ती करण्यात आली आहे. राज्यपाल तथा विद्यापीठाचे कुलपती जिष्णु देव वर्मा यांनी गुरुवारी ही नियुक्ती जाहीर केली. डॉ. गिते यांची नियुक्ती पाच वर्षांच्या कालावधीसाठी करण्यात आली आहे.
लेफ्टनंट जनरल डॉ. माधुरी कानिटकर यांचा कुलगुरूपदाचा कार्यकाळ १४ ऑक्टोबर २०२५ रोजी संपल्यानंतर हे पद रिक्त झाले होते. त्यानंतर यशवंतराव चव्हाण महाराष्ट्र मुक्त विद्यापीठाचे कुलगुरू प्रा. संजीव सोनवणे यांच्याकडे आरोग्य विज्ञान विद्यापीठाच्या कुलगुरूपदाचा अतिरिक्त कार्यभार सोपविण्यात आला होता.
डॉ. गिते यांनी २००१ मध्ये एम.एस. (शल्यचिकित्सा) आणि २०१० मध्ये डीएनबी (युरोलॉजी) ही पदवी संपादन केली आहे. त्यांनी शासकीय वैद्यकीय महाविद्यालय व सुपरस्पेशालिटी ब्लॉक, छत्रपती संभाजीनगर येथे युरोलॉजी विभागाचे प्राध्यापक व विभागप्रमुख म्हणून काम केले असून, सध्या ते शासकीय वैद्यकीय महाविद्यालय, नाशिक येथे अधिष्ठाता म्हणून कार्यरत आहेत.
शासकीय आरोग्य व्यवस्थेत कॅडव्हर किडनी प्रत्यारोपण (Cadaver Renal Transplant) कार्यक्रम सुरू करण्यात डॉ. गिते यांचे महत्त्वपूर्ण योगदान राहिले आहे. तसेच महाराष्ट्र शासनाच्या आरोग्य विभागाच्या अवयव प्रत्यारोपण कार्यक्रमाचे ते सल्लागार सदस्य म्हणूनही कार्यरत आहेत.
वैद्यकीय शिक्षण आणि संशोधन क्षेत्रातही डॉ. गिते यांनी उल्लेखनीय योगदान दिले आहे. त्यांच्या नावावर ५३ संशोधन निबंध आणि सहा पुस्तके प्रकाशित असून, वैद्यकीय शिक्षण, संशोधन आणि आरोग्य सेवांमधील त्यांच्या कार्याची व्यापक दखल घेण्यात आली आहे.
दरम्यान, कुलगुरूपदासाठी योग्य उमेदवाराची निवड करण्यासाठी राज्यपालांनी डॉ. सी. ई. ईपन, प्राध्यापक, ख्रिश्चन मेडिकल कॉलेज, वेल्लोर यांच्या अध्यक्षतेखाली शोध समितीची स्थापना केली होती. समितीमध्ये वैद्यकीय शिक्षण व औषध विभागाचे सचिव धीरज कुमार आणि राष्ट्रीय मलेरिया संशोधन संस्थेचे संचालक डॉ. अनुपकुमार आर. अन्वीकर यांचा समावेश होता. शोध समितीने शिफारस केलेल्या उमेदवारांच्या वैयक्तिक मुलाखती घेतल्यानंतर राज्यपाल तथा कुलपती जिष्णु देव वर्मा यांनी डॉ. व्यंकट गिते यांच्या नावावर अंतिम शिक्कामोर्तब करत त्यांच्या कुलगुरूपदी नियुक्तीची घोषणा केली.
