महाविद्यालयांत शिक्षण घेणारे ७००० विद्यार्थी HIV बाधित; आरोग्य विभागाची धक्कादायक माहिती
आरोग्य विभागाच्या मोहिमेनुसार, कॉलेज विद्यार्थ्यांमध्ये एचआयव्ही संसर्गाचे प्रमाण लक्षणीय वाढले आहे. अभ्यास, परीक्षा आणि नव्या सामाजिक वातावरणात व्यस्त असलेल्या विद्यार्थ्यांना लैंगिक शिक्षण आणि सुरक्षिततेची माहिती अपुरी पडत असल्याचे स्पष्ट झाले आहे.
Eduvarta
एज्युवार्ता न्यूज नेटवर्क
कर्नाटकातील विविध महाविद्यालयांमध्ये (Colleges in Karnataka) आयोजित विशेष आरोग्य तपासणी शिबिरांमधून (Health Check-up Camp) धक्कादायक माहिती समोर आली आहे. राज्यातील महाविद्यालयांत शिक्षण घेणारे तब्बल ७ हजार विद्यार्थी एचआयव्ही बाधित (7 thousand students infected with HIV) असल्याचे आरोग्य विभागाच्या तपासणीत उघड झाले आहे. ही आकडेवारी शैक्षणिक क्षेत्रासाठी मोठी चिंतेची बाब (A matter of concern for the educational sector) ठरली आहे.
महाविद्यालयीन जीवनात स्वातंत्र्य मिळत असताना अनेक विद्यार्थ्यांमध्ये असुरक्षित संबंध आणि आरोग्याविषयी जागरूकतेचा अभाव दिसून येत आहे. आरोग्य विभागाच्या मोहिमेनुसार, कॉलेज विद्यार्थ्यांमध्ये एचआयव्ही संसर्गाचे प्रमाण लक्षणीय वाढले आहे. अभ्यास, परीक्षा आणि नव्या सामाजिक वातावरणात व्यस्त असलेल्या विद्यार्थ्यांना लैंगिक शिक्षण आणि सुरक्षिततेची माहिती अपुरी पडत असल्याचे स्पष्ट झाले आहे.
शैक्षणिक संस्थांमध्ये विद्यार्थी मोठ्या संख्येने शिकत असताना, एचआयव्ही आणि लैंगिक आरोग्य या विषयांवर खुल्या चर्चेला अजूनही संकोच असल्याचे दिसते. अनेक विद्यार्थी आजाराविषयी बोलण्यास टाळाटाळ करतात. यामुळे संसर्ग लवकर ओळखला जात नाही आणि उपचारातही विलंब होतो. महाविद्यालयीन वयातील विद्यार्थी भावी पिढीचे भविष्य घडवणारे असल्याने ही समस्या शैक्षणिक दृष्टिकोनातून अत्यंत गंभीर मानली जात आहे.
आरोग्य विभागाने सांगितले की, कर्नाटकात ५४ हजारांहून अधिक लोकांना स्वतःच्या एचआयव्ही स्थितीची माहिती नाही. यातील अनेक तरुण विद्यार्थी किंवा त्यांच्या निकटवर्तीयांमध्ये असू शकतात. नकळत होणारा संसर्ग महाविद्यालयीन वातावरणातही पसरू शकतो, ज्यामुळे शैक्षणिक कामगिरी, मानसिक आरोग्य आणि भविष्यातील संधींवर विपरित परिणाम होण्याची शक्यता आहे.
या धक्कादायक आकडेवारीनंतर कर्नाटक सरकार आणि आरोग्य विभागाने महाविद्यालयांमध्ये विशेष पाऊले उचलली आहेत. सर्व कॉलेजांमध्ये लैंगिक शिक्षण, सुरक्षित संबंध, एचआयव्ही प्रतिबंध आणि नियमित तपासणी याबाबत जनजागृती सत्रे आणि कार्यशाळा आयोजित करण्यात येत आहेत. विद्यार्थ्यांना मोफत एचआयव्ही तपासणी सुविधा उपलब्ध करून देण्यात येत आहे. महाविद्यालयीन प्राचार्य आणि शिक्षकांनी विद्यार्थ्यांना या विषयावर मार्गदर्शन करण्याचे आवाहन करण्यात आले आहे.
