विद्यार्थ्यांना बनावट गुणपत्रक-पदवीप्रमाणपत्र देणारा SPPU विद्यापीठातील कर्मचारी निलंबित
मुखेकर याने परीक्षा विभागाच्या कार्यपद्धतीचा गैरफायदा घेऊन स्वतःच्या आर्थिक फायद्यासाठी हे गैरकृत्य केल्याचे स्पष्ट झाले आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठात बनावट गुणपत्रक आणि पदवीप्रमाणपत्र देऊन विद्यार्थ्यांची फसवणूक केल्याचा धक्कादायक प्रकार उघडकीस आला. बी. कॉम. च्या अभ्यासक्रमाचे गुणपत्रक व पदवी प्रमाणपत्र मिळवून देण्याच्या बहाण्याने एका विद्यार्थ्याकडून तब्बल ७० हजार रुपये उकळणाऱ्या वित्त व लेखा विभागातील कर्मचारी रमेश दामोदर मुखेकर याला विद्यापीठ प्रशासनाने तात्काळ प्रभावाने सेवेतून निलंबित केले आहे. याप्रकरणी चतुःश्रृंगी पोलीस ठाण्यात रीतसर फिर्याद दाखल करण्यात आली आहे, असे विद्यापीठाचे प्रभारी कुलसचिव डॉ प्रफुल्ल पवार यांनी पत्रकाद्वारे कळवले आहे l.
विद्यापीठाने दिलेल्या माहितीनुसार, रमेश मुखेकर याने साहिल महेश कदम या विद्यार्थ्याला बी. कॉम. चे गुणपत्रक आणि पदवी प्रमाणपत्र देण्याचे आमिष दाखवले होते. या बदल्यात त्याने विद्यार्थ्याकडून 'गुगल पे' (Google Pay) द्वारे ७० हजार रुपये स्वीकारले. पैसे घेतल्यानंतर मुखेकर याने कॉम्प्युटरवर तयार केलेल्या आणि हुबेहूब मूळ कागदपत्रांसारख्या दिसणाऱ्या इमेजेस व्हॉट्सअॅपवर पाठवून विद्यार्थ्याची फसवणूक केली. यासंदर्भात विद्यापीठाकडे तक्रार प्राप्त झाल्यानंतर प्रशासनाने या प्रकरणाची गंभीर दखल घेतली.
परीक्षा विभागाचा संबंध नाही; पोलिसांत तक्रार
विद्यापीठाने केलेल्या प्राथमिक चौकशीत, संबंधित कर्मचारी रमेश मुखेकर हा परीक्षा विभागात कार्यरत नसून वित्त व लेखा विभागात कार्यरत असल्याचे समोर आले. त्याने व्हॉट्सअॅपवर तयार करून पाठवलेली कागदपत्रे परीक्षा विभागाच्या अधिकृत अभिलेखांशी (रेकॉर्ड्स) जुळत नसल्याचे निष्पन्न झाले. मुखेकर याने परीक्षा विभागाच्या कार्यपद्धतीचा गैरफायदा घेऊन स्वतःच्या आर्थिक फायद्यासाठी हे गैरकृत्य केल्याचे स्पष्ट झाले आहे.
प्रकरणाचे गांभीर्य लक्षात घेऊन परीक्षा व मूल्यमापन मंडळाचे संचालक डॉ. राजेंद्र तलवारे यांनी चतुःश्रृंगी पोलीस ठाण्यात रीतसर फिर्याद नोंदवली आहे. या गैरप्रकारात व्यवस्थापनातील किंवा परीक्षा विभागातील इतर कोणाचा सहभाग आहे का, याचा शोध आता पोलीस तपासात घेतला जाणार आहे.
सुरक्षामानके मजबूत; अफवांवर विश्वास ठेवू नका
"विद्यापीठाकडून जारी करण्यात येणाऱ्या सर्व परीक्षेच्या गुणपत्रिका आणि पदवीप्रमाणपत्रांमध्ये अतिउच्च दर्जाच्या सुरक्षामानकांचा (Security Features) समावेश असतो. त्यामुळे अशा प्रकारे बनावट कागदपत्रे बनवून फसवणूक करणाऱ्यांना थारा दिला जाणार नाही. पोलीस तपासात दोषी आढळणाऱ्यांवर कठोर कारवाई केली जाईल. विद्यार्थी व पालकांनी अशा कोणत्याही आमिषांना बळी पडू नये व अफवांवर विश्वास ठेवू नये," असे आवाहन विद्यापीठ प्रशासनाकडून करण्यात आले आहे.
