संतापजनक! आश्रमशाळा  वसतिगृहातील विद्यार्थ्यांना अश्लील व्हिडीओ दाखवून लैंगिक अत्याचार

एज्युवार्ता न्यूज नेटवर्क 

चंद्रपूर जिल्ह्यातील एका आश्रमशाळेच्या वसतिगृहात (Chandrapur District Ashramshala Hostel) राहणाऱ्या १० आणि ११ वर्षांच्या दोन अल्पवयीन विद्यार्थ्यांवर लैंगिक अत्याचार (Minor students Sexual assault) झाल्याची धक्कादायक घटना उघडकीस आली आहे. या प्रकरणामुळे जिल्ह्यात तीव्र संताप व्यक्त होत असून, पीडित विद्यार्थ्यांवर सध्या शासकीय रुग्णालयात (Government Hospital) उपचार सुरू आहेत. पोलिसांकडून प्रकरणाचा कसून तपास (Police investigation) केला जात आहे.

पीडित विद्यार्थ्यांच्या आईने पोलिसांत दिलेल्या तक्रारीनुसार, शाळेतील एका शिक्षकाने दोन मुलांची प्रकृती बिघडल्याची माहिती त्यांच्या कुटुंबीयांना दिली. उपचारानंतरही आराम न मिळाल्याने दोन्ही विद्यार्थ्यांना त्यांच्या आजीकडे सोडण्यात आले. त्यावेळी शाळा प्रशासनाने केवळ आजारपणाचे कारण सांगून त्यांना घरी पाठवले होते.

नंतर प्रकृती अधिक बिघडल्याने आजीने विद्यार्थ्यांना रुग्णालयात नेले. तेथे विद्यार्थ्यांनी आजीसमोर आणि नंतर आईसमोर वसतिगृहात घडलेला प्रकार सांगितला. पीडित विद्यार्थ्यांच्या म्हणण्यानुसार, वसतिगृहातील दोन मोठ्या विद्यार्थ्यांनी रात्रीच्या वेळी अश्लील व्हिडिओ दाखवून त्यांच्यावर लैंगिक अत्याचार केला आणि याबाबत कोणालाही सांगितल्यास गंभीर परिणाम भोगावे लागतील, अशी धमकी दिली.

घटनेची माहिती समजल्यानंतर आईने प्रथम विद्यार्थ्यावर स्थानिक रुग्णालयात उपचार केले. त्यानंतर पुढील तपासणी व उपचारासाठी विद्यार्थ्यांना चंद्रपूर शासकीय रुग्णालयात हलवण्यात आले. डॉक्टरांनी त्यांना दाखल करून उपचार सुरू केले असून, वैद्यकीय अहवाल आल्यानंतर प्रकरण अधिक स्पष्ट होईल, असे सांगण्यात येते.

विद्यार्थ्यांनी यापूर्वीही शाळेतील वरिष्ठांकडे तक्रार केली होती. मात्र त्याची गांभीर्याने दखल घेण्यात आली नाही; उलट विद्यार्थ्यांना मारहाण करण्यात आल्याचाही आरोप कुटुंबीयांनी केला  आहे. त्यामुळे केवळ प्रत्यक्ष आरोपींवरच नव्हे, तर आश्रमशाळेचे अधिकारी, वसतिगृह प्रशासन आणि संबंधित कर्मचाऱ्यांच्या भूमिकेचीही चौकशी व्हावी, अशी मागणी कुटुंबीयांनी केली आहे.

या घटनेमुळे आश्रमशाळा आणि वसतिगृहांमधील सुरक्षिततेबाबत प्रश्न उपस्थित झाले आहेत. पोलिस तपास सुरू असताना स्थानिक प्रशासनानेही प्रकरणाची गंभीर दखल घेतली आहे. पीडित विद्यार्थ्यांच्या आरोग्याची स्थिती स्थिर असल्याचे सांगण्यात येत असून, न्यायिक प्रक्रिया लवकर पूर्ण होईल, अशी अपेक्षा व्यक्त केली जात आहे.