ओबीसी विद्यार्थ्यांसाठी शासकीय वसतिगृह प्रवेश प्रक्रिया सुरू; ३१ ऑगस्टपर्यंत ऑनलाइन अर्ज करा

एज्युवार्ता न्यूज नेटवर्क

शैक्षणिक सत्र २०२६-२७ साठी (Academic Session 2026-27) इतर मागासवर्ग (ओबीसी), विमुक्त जाती, भटक्या जमाती आणि विशेष मागास प्रवर्गातील मुला-मुलींसाठी शासकीय वसतिगृह प्रवेश प्रक्रियेची (Gov. Hostel Admission Process) ऑनलाइन नोंदणी सुरू (Online registration has started) झाली आहे. या प्रक्रियेत शासकीय वसतिगृहांबरोबरच ज्ञानज्योती सावित्रीबाई फुले आधार योजना आणि पं. दिनदयाल उपाध्याय स्वयं योजनेअंतर्गत उच्च शिक्षण घेणाऱ्या विद्यार्थ्यांनाही प्रवेश दिला जाणार आहे. इतर मागास बहुजन कल्याण विभागाने (Other Backward Bahujan Welfare Department) याबाबत आवाहन केले आहे.

अर्ज प्रक्रिया https://hmasnew.mahait.org या शासकीय ऑनलाइन पोर्टलवरून करता येणार आहे. अर्ज दाखल करण्याची अंतिम मुदत ३१ ऑगस्ट २०२६ निश्चित करण्यात आली आहे. ऑनलाइन अर्ज भरल्यानंतर त्याची प्रिंट काढून आवश्यक कागदपत्रांसह संबंधित वसतिगृह प्रमुखांकडे सादर करणे बंधनकारक आहे. वेळेत अर्ज न भरल्यास किंवा कागदपत्रे सादर न केल्यास प्रवेशापासून वंचित राहण्याची शक्यता आहे.

शासकीय वसतिगृहांमध्ये प्रवेश गुणवत्तेनुसार आणि उपलब्ध क्षमतेनुसार दिला जाईल. पात्रता असूनही शासकीय वसतिगृहात जागा न मिळालेल्या विद्यार्थ्यांना स्वयं आणि आधार योजनांमधून प्रवेशासाठी विचारात घेतले जाईल. यामुळे अधिकाधिक विद्यार्थ्यांना उच्च शिक्षणाची संधी उपलब्ध होणार आहे आणि ग्रामीण तसेच मागासवर्गीय विद्यार्थ्यांना मोठा दिलासा मिळेल.

अधिक माहितीसाठी विद्यार्थ्यांनी संबंधित शासकीय वसतिगृहातील गृहपाल किंवा सहाय्यक संचालक, इतर मागास बहुजन कल्याण कार्यालय यांच्याशी संपर्क साधावा, असे आवाहन विभागाने केले आहे. पात्र विद्यार्थ्यांनी अंतिम मुदतीपूर्वी अर्ज प्रक्रिया पूर्ण करावी.