आरटीई प्रवेशाचा अर्ज 10 मेपर्यंत भरता येणार; शिक्षण विभागाकडून परिपत्रक प्रसिद्ध
पालकांना आपल्या पाल्याचा आरटीई प्रवेशाचा अर्ज भरण्यासाठी शिक्षण विभागाने येत्या 10 मे पर्यंत मुदतवाढ दिली आहेत.
eduvarta@gmail.com 
एज्युवार्ता न्यूज नेटवर्क
शालेय शिक्षण विभागातर्फे (Department of School Education)2024-25 शैक्षणिक वर्षासाठी ऑनलाईन आरटीई प्रवेश प्रक्रिया (RTE Admission Process)राबवली जात आहे. शिक्षण विभागाने प्रवेश अर्ज भरण्यासाठी 30 एप्रिलपर्यंत मुदत दिली होती. परंतु, इच्छुक पालकांना आपल्या पाल्याचा आरटीई प्रवेशाचा अर्ज भरण्यासाठी शिक्षण विभागाने येत्या 10 मे पर्यंत मुदतवाढ (Extension till May 10)दिली आहेत.
राज्यातील आरटीई प्रवेशासाठी अर्ज केलेल्या विद्यार्थ्यांची संख्या सुमारे 62 हजारापर्यंत पोचली आहे. परंतु, अजूनही अनेक पालकांनी आरटीई प्रवेशासाठी भरलेला अर्ज कन्फर्म केलेला नाही. त्यामुळे अद्याप अर्ज न भरलेल्या पालकांना आपल्या पाल्याचा अर्ज भरता येऊ शकतो.
शासनातर्फे २०२४-२५ या वर्षाची आरटीई २५ टक्के प्रवेश प्रक्रीया ऑनलाईन राबविण्यात येत असून सन २०२४-२५ या शैक्षणिक वर्षाकरिता आरटीई २५ टक्के राखीव जागांवरील प्रवेश प्रक्रीयेंतर्गत दिनांक १६.०४.२०२४ ते ३०.०४.२०२४ या कालावधीमध्ये पालकाना प्रवेशाकरिता ऑनलाईन अर्ज भरण्याकरीता सुविधा उपलब्ध करुन देण्यात आलेली होती. पालकाना आरटीई २५ टक्के प्रवेशाकरिता ऑनलाईन अर्ज भरण्याकरीता दिनांक १०.०५.२०२४ पर्यंत मुदतवाढ देण्यात येत आहे,असे राज्याचे प्राथमिक शिक्षण संचालक शरद गोसावी यांनी परिपत्रकाद्वारे स्पष्ट केले आहे.
