अखेर मराठी भाषा भवनाच्या उद्घाटनाचा मुहूर्त सापडला

एज्युवार्ता न्यूज नेटवर्क 

गेल्या अनेक वर्षांपासून प्रलंबित असलेल्या सावित्रीबाई फुले विद्यापीठातील (Savitribai Phule University)मराठी भाषा भावनाच्या (Marathi Bhasha Bhavan)कामाला अखेर गती मिळाली असून येत्या १ मे रोजी सकाळी १० वाजता विद्यापीठाचे कुलगुरू डॉ.सुरेश गोसावी यांच्या हस्ते मराठी भाषा भवनाच्या पहिल्या टप्प्याचे लोकार्पण होणार आहे. त्यामुळे उशिरा का होईना भाषा भवनाला मुहूर्त मिळाला अशी भावना भाषा प्रेमींकडून केली जात आहे.

पुणे विद्यापीठाची स्थापना मराठी भाषेच्या विकासासाठी व उत्कर्षासाठी झाली होती. मात्र, बदलत्या काळानुरूप इतर ज्ञानशाखा व विद्याशाखा विस्तारत गेल्या. त्यात मराठी भाषा विभागाकडे दुर्लक्ष झाले.मात्र, माजी कुलगुरू डॉ. अरुण निगवेकर यांच्या काळात विद्यापीठात मराठी भाषा भवन स्थापनेस मंजुरी मिळाली. परंतु, भाषा भवनाच्या कामाची मुहूर्तमेढ रोवली जात नव्हती. काही वर्षांपूर्वी भाषा भावनाच्या इमारतीच्या कामाला सुरुवात झाली. परंतु,विविध कारणांमुळे इमारतीचे काम पूर्ण होऊ शकले नाही. मात्र, आता इमारतीचा काही भाग पूर्ण झाला आहे. त्यामुळे मराठी भाषा भावनाच्या पहिल्या टप्प्याचे लोकार्पण केले जाणार आहे.

विविध विद्यार्थी संघटनांनी मराठी भाषा भावनांच्या इमारतीच्या बांधकामाला केव्हा सुरुवात होणार तसेच इमारतीचे काम केव्हा पूर्ण होणार ? याबाबत विद्यापीठाकडे पाठपुरावा केला होता. तसेच वेळोवेळी आंदोलने केली होती. विद्यार्थी संघटनांनी केलेली आंदोलने अखेर फळास आली आहेत.

भाषा भवन लोकार्पण सोहळ्यास कुलगुरू डॉ. सुरेश गोसावी यांच्यासह कुलगुरू डॉ. पराग कळकर प्रभारी कुलसचिव डॉ. विजय खरे व्यवस्थापन परिषदेचे सर्व सदस्य तसेच विविध अधिकार मंडळाचे सदस्य उपस्थित राहणार आहेत.