NEET UG केंद्र निहाय निकाल शनिवारपर्यंत जाहीर करा; सर्वोच्च न्यायालयाचे NTA ला आदेश 

एज्युवार्ता न्यूज नेटवर्क 

NEET UG परीक्षांचे केंद्र निहाय निकाल (Center wise results) परीक्षेच्या संकेतस्थळावर उपलब्ध करून देण्याचे आदेश विभागीय खंडपीठाने एनटीएला दिले आहेत. त्यासाठी एजन्सीला शनिवारपर्यंतची मुदत देण्यात आली आहे. सुनावणी दरम्यान एनटीएने पुन्हा एकदा पेपरफुटीच्या घटनेचा दावा फेटाळला आहे. NEET UG 2024 परीक्षा पुन्हा आयोजित करण्याची मागणी करणाऱ्या 40 हून अधिक याचिकांवर गुरुवारी सर्वोच्च न्यायालयात पुन्हा सुनावणी झाली. न्यायमूर्ती डी. वाय.चंद्रचूड (Justice D. Y. Chandrachud)आणि न्यायमूर्ती जे. बी. परडीवाला आणि न्यायमूर्ती मनोज मिश्रा यांच्या खंडपीठाने ही सुनावणी दिली.

  18 जुलैच्या सुनावणीचे ठळक मुद्दे

* एनटीएने विभागीय खंडपीठाला सांगितले की, पुन्हा उघडलेल्या अर्ज विंडोमध्ये 15 हजार अर्ज आले आहेत. त्यापैकी केवळ 44 प्रवेशासाठी पात्र ठरले आहेत. 

* पेपरफुटी प्रकरणांची पुन्हा चौकशी करण्याची मागणी करणाऱ्या याचिका खंडपीठाने फेटाळून लावल्या. 

* खंडपीठाने सांगितले की, NEET परीक्षा पुन्हा घेण्याची मागणी १३१ विद्यार्थ्यांकडून केली जात आहे, तर २५४ विद्यार्थ्यांचा विरोध आहे.

* विभागीय खंडपीठाने याचिकाकर्त्यांना हे सिद्ध करण्यास सांगितले की पेपरफुटीचा फायदा इतक्या विद्यार्थ्यांना झाला की परीक्षा रद्द करावी लागली.

NTA द्वारे 5 मे रोजी घेण्यात आलेल्या NEET UG 2024 च्या पेपर लीक आणि जून रोजी जाहीर झालेल्या निकालातील टॉपर्सची संख्या, ग्रेस मार्क्स, कट ऑफ इत्यादींबाबत उपस्थित केलेल्या प्रश्नांच्या आधारे या याचिका 11 जुलै रोजी सर्वोच्च न्यायालयात दाखल करण्यात आल्या होत्या. मागच्या सुनावणीदरम्यान, CJI ने याचिकाकर्त्यांना NTA आणि केंद्र सरकारने पेपर लीक आणि अनियमिततेवर सादर केलेल्या अहवालांवर त्यांचे उत्तर सादर करण्यास सांगितले होते. त्यासोबतच या याचिकांवर १८ जुलै रोजी सुनावणी घेण्याचे निर्देशही खंडपीठाने दिले होते.