नीट यूजी २०२६ पुनर्परीक्षेची तारीख जाहीर, एनटीएची अधिकृत माहिती

एज्युवार्ता न्यूज नेटवर्क

पेपरफुटीच्या गंभीर आरोपांमुळे रद्द करण्यात आलेल्या नीट यूजी २०२६ (NEET UG 2026) परीक्षेची पुनर्परीक्षा (Re-NEET) आता २१ जून २०२६ रोजी घेण्यात येणार आहे. नॅशनल टेस्टिंग एजन्सीने (NTA) आज ही माहिती अधिकृतपणे जाहीर केली आहे. NTA च्या अधिकृत माहितीनुसार, पुनर्परीक्षा रविवारी दुपारी २:०० ते सायंकाळी ५:०० दरम्यान ऑफलाइन पेन आणि पेपर पद्धतीनेघेतली जाईल. 

ज्या विद्यार्थ्यांनी यापूर्वी NEET UG 2026 साठी अर्ज केला होता, त्यांना पुन्हा नोंदणी करण्याची गरज नाही. त्यांचे पूर्वीचे अर्ज वैध राहतील. नवीन प्रवेशपत्र लवकरच NTA च्या अधिकृत वेबसाइटवर उपलब्ध करण्यात येणार असल्याचेही स्पष्ट करण्यात आले आहे. परीक्षेच्या केंद्रांची माहिती आणि सविस्तर वेळापत्रक देखील लवकरच जाहीर केले जाईल, असे एनटीएने स्पष्ट केले आहे. 

NEET परीक्षेत पेपरफुटी आणि अनियमिततेच्या आरोपांमुळे देशभरात मोठा गोंधळ निर्माण झाला होता. विद्यार्थ्यांसह पालकांनी तीव्र नाराजी व्यक्त केली होती. महाराष्ट्रातूनही मनसे नेते राज ठाकरे यांनी याबाबत केंद्र सरकार आणि शिक्षणमंत्री धर्मेंद्र प्रधान यांच्या राजीनाम्याची मागणी केली होती. या प्रकरणामुळे विद्यार्थ्यांच्या भवितव्याचा प्रश्न निर्माण झाला होता. पुनर्परीक्षा पूर्णपणे पारदर्शक आणि निष्पक्ष पद्धतीने घेण्यात येईल. यासाठी कडक सुरक्षा व्यवस्था आणि नवीन प्रश्नपत्रिका तयार करण्यात येत आहेत, असे आश्वासन  NTA ने विद्यार्थ्यांना दिले आहे.

या पुनर्परीक्षेमुळे विद्यार्थ्यांना न्याय मिळेल, मात्र त्यासाठी आता फक्त एक महिन्यापेक्षा कमी वेळ शिल्लक असल्याने विद्यार्थ्यांनी तयारीला वेग द्यावा, असे आवाहन केले जात आहे. तसेच अधिकृत वेबसाइट nta.ac.in वर नियमित अपडेट्स तपासत राहावे आणि फेक न्यूज किंवा अफवांवर विश्वास ठेवू नये, असा NTA ने विद्यार्थ्यांना सल्ला दिला आहे.