ITI Admission 2026: संस्थास्तरीय समुपदेशन फेरीचे वेळापत्रक जाहीर; १२ ऑगस्टपासून प्रवेश प्रक्रिया
राज्यातील शासकीय व खासगी औद्योगिक प्रशिक्षण संस्थांमधील (ITI) शिल्प कारागीर प्रशिक्षण योजनेअंतर्गत ऑगस्ट २०२६ सत्राच्या प्रवेश प्रक्रियेला गती मिळाली आहे. व्यवसाय शिक्षण व प्रशिक्षण संचालनालयाचे संचालक सतीश सूर्यवंशी यांनी प्रसिद्धिपत्रकाद्वारे संस्थास्तरीय समुपदेशन फेरीचे पूर्ण वेळापत्रक जाहीर केले आहे.
Eduvarta
एज्युवार्ता न्यूज नेटवर्क
राज्यातील शासकीय व खासगी औद्योगिक प्रशिक्षण संस्थांमधील (ITI) शिल्प कारागीर प्रशिक्षण योजने (Craftsman Training Scheme) अंतर्गत ऑगस्ट २०२६ सत्राच्या प्रवेश प्रक्रियेला (ITI Admission Process) गती मिळाली आहे. व्यवसाय शिक्षण व प्रशिक्षण संचालनालयाचे संचालक (Directorate of Vocational Education and Training) सतीश सूर्यवंशी (Satish Suryawanshi)यांनी प्रसिद्धिपत्रकाद्वारे संस्थास्तरीय समुपदेशन फेरीचे पूर्ण वेळापत्रक जाहीर केले आहे. केंद्रीय ऑनलाइन प्रवेश प्रणालीद्वारे https://admission.dvet.gov.in या संकेतस्थळावर ही संपूर्ण प्रवेश प्रक्रिया राबवली जात असून, पात्र उमेदवारांना वेळापत्रकानुसार आवश्यक कार्यवाही करण्याचे आवाहन करण्यात आले आहे.
नोंदणी केलेल्या मात्र अद्याप प्रवेश न मिळालेल्या उमेदवारांसाठी ६ ते ७ ऑगस्ट या कालावधीत प्रवेश अर्जातील आवश्यक बदल किंवा हरकती नोंदविण्याची संधी उपलब्ध आहे. ८ ऑगस्ट रोजी सायंकाळी ५ वाजेपर्यंत समुपदेशन फेरीसाठी एकत्रित गुणवत्ता यादी प्रसिद्ध करण्यात येणार असून, उमेदवारांना याबाबत एसएमएसद्वारे सूचना दिली जाईल. या यादीच्या आधारे पात्र उमेदवार ९ ते १० ऑगस्ट या कालावधीत आपल्या प्रवेश खात्यात लॉगिन करून इच्छित आयटीआय व व्यवसायासाठी नोंदणी करू शकतील.
११ ऑगस्ट रोजी सकाळी ११ वाजेपर्यंत संस्थानिहाय गुणवत्ता यादी व समुपदेशनाची तारीख व वेळ जाहीर करण्यात येणार आहे. त्यानंतर १२ आणि १३ ऑगस्ट रोजी सकाळी ८ ते सायंकाळी ५ वाजेपर्यंत संबंधित संस्थांमध्ये प्रत्यक्ष समुपदेशन फेरी व जागा वाटप प्रक्रिया राबवली जाईल. यावेळी गुणवत्ता, उपलब्ध जागा आणि पात्रतेच्या आधारावर प्रवेश निश्चित करण्यात येणार असून, मूळ कागदपत्र पडताळणी व प्रत्यक्ष प्रवेशही याच कालावधीत होईल.
दुसऱ्या टप्प्यात संस्थास्तरीय समुपदेशन फेरी क्रमांक २ ते ७ दिनांक १७ ते २२ ऑगस्ट या कालावधीत आयोजित करण्यात येणार आहेत. या फेऱ्यांत उमेदवारांची प्रत्यक्ष हजेरी नोंदणी सकाळी ८ ते ११ वाजेपर्यंत, संस्थानिहाय गुणवत्ता यादी दुपारी १२ वाजता प्रसिद्ध आणि दुपारी १ वाजेपासून समुपदेशन व जागावाटप अंतिम उमेदवारापर्यंत चालणार आहे. खासगी आयटीआय संस्थांमधील संस्थास्तरावरील प्रवेश प्रक्रिया १३ जुलैपासून सुरू झाली असून, ती २२ ऑगस्ट रात्री ११:५९ वाजेपर्यंत सुरू राहील.
उमेदवारांनी वेळापत्रक काळजीपूर्वक पाळावे आणि संकेतस्थळावर नियमित अपडेट तपासावेत, असे संचालनालयाने सांगितले आहे. या प्रवेश प्रक्रियेमुळे इच्छुक विद्यार्थ्यांना आयटीआयमधील व्यावसायिक प्रशिक्षण घेण्याची सुवर्णसंधी उपलब्ध होणार आहे. अधिक माहितीसाठी अधिकृत संकेतस्थळ https://admission.dvet.gov.in भेट द्या.
