TET परीक्षेची नवी तारीख जाहीर झाली का? परीक्षा परिषदेकडून अधिकृत घोषणा
सोशल मीडियावर टीईटी संदर्भातील वेगवेगळ्या अफवांचा सुळसुळाट सुरू झाला आहे. पुढील परीक्षा येत्या 6 जुलै रोजी घेतली जाणार असल्याचे एक बनावट परिपत्रक सध्या सोशल मीडियावर व्हायरल होत आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य परीक्षा परिषदेतर्फे 28 जून रोजी घेतली जाणारी शिक्षक पात्रता परीक्षा (TET) पेपर फुटीमुळे रद्द करण्यात आली आहे. मात्र, पुढील परीक्षा केव्हा घेतली जाईल, याबाबतचे बनावट पत्रक सोशल मीडियावर व्हायरल होत आहे. या पार्श्वभूमीवर परीक्षा परिषदेने अधिकृत प्रकटन प्रसिद्ध केले असून टीईटी परीक्षेसंदर्भातील नवीन दिनांक अद्याप जाहीर केलेली नाही. उमेदवारांनी कोणत्याही अफवांवर विश्वास ठेवू नये, परीक्षेचा दिनांक यथावकाश परीक्षा परिषदेच्या संकेतस्थळावर जाहीर केला जाईल, असे परीक्षा परिषदेचे आयुक्त महेश चोथे यांनी स्पष्ट केले आहे.
शिक्षक पात्रता परीक्षेसाठी राज्यभरातील सहा लाख १२५ उमेदवारांनी नोंदणी केली होती. मात्र, पेपर फुटीमुळे शिक्षण विभागावर परीक्षा रद्द करण्याची नाचक्की वाढवली. भिवंडी येथे पेपर फुटी प्रकरणी 3 आरोपींना पकडले आहे. मात्र, सोशल मीडियावर टीईटी संदर्भातील वेगवेगळ्या अफवांचा सुळसुळाट सुरू झाला आहे. पुढील परीक्षा येत्या 6 जुलै रोजी घेतली जाणार असल्याचे एक बनावट परिपत्रक सध्या सोशल मीडियावर व्हायरल होत आहे.
टीईटी परीक्षा रद्द झाल्यामुळे शिक्षक व इतर उमेदवारांमध्ये संतापाची लाट उसळली आहे. त्यात आता सोशल मीडियावर बनावट परिपत्रक प्रसिद्ध होत असल्याने उमेदवारांचा गोंधळ उडाला आहे. त्या पार्श्वभूमीवर परीक्षा परिषदेने प्रसिद्धीपत्रक काढले आहे.
परीक्षा परिषदेने पेपर फुटीच्या पार्श्वभूमीवर 28 जून रोजी होणारी शिक्षक पात्रता परीक्षा पुढे ढकलण्याचा निर्णय घेतला आहे. पुढील परीक्षा केव्हा घेतली जाईल याबाबतचा निर्णय अद्याप झालेला नाही. तरीही कोणत्याही सोशल मीडियाच्या अफवांवर विश्वास ठेवू नये, पुढील परीक्षेचा दिनांक परीक्षा परिषदेच्या संकेतस्थळावर यथावकाश जाहीर केला जाईल असे परीक्षा परिषदेने स्पष्ट केले आहे.
