सीईटी सेलकडून एलएलबी, बीएड, बीपीएड, एमएड, एमपीएड, बीएड एमड परीक्षांचे वेळापत्रक निश्चित

एज्युवार्ता न्यूज नेटवर्क 

राज्य सामाईक प्रवेश परीक्षा (State Common Entrance Test) कक्षातर्फे २०२६ मध्ये घेतल्या जाणाऱ्या शैक्षणिक वर्ष २०२६-२७ साठी उच्च शिक्षण अभ्यासक्रमांच्या सामाईक प्रवेश परीक्षेच्या तारखा जाहीर (CET Dates Announced) करण्यात आल्या आहेत. एलएलबी (३ वर्ष व ५ वर्ष), बीएड (जनरल व स्पेशल) व बीएड (इएलसीटी), बीपीएड, एमएड, एमपीएड व बीएड एमएड (LLB, BEd, BPEd, MEd, MPed, BEd MEd) या सात अभ्यासक्रमाच्या प्रवेश परीक्षेच्या (Entrance Exams for Seven Courses) तारखा सीईटी कक्षाने निश्चित करत अंतिम तारखा जाहीर केल्या. या सात अभ्यासक्रमापैकी सहा प्रवेश परीक्षेची प्रवेश नोंदणी पूर्ण झाली आहे. यातील विधि (५ वर्ष) या अभ्यासक्रमाच्या प्रवेश परीक्षेची नोंदणी १५ मार्चपर्यंत सुरु आहे.

सीईटी सेलच्या वेळापत्रकानुसार, एम.पी.एड. अभ्यासक्रमाची परीक्षा २४ मार्च रोजी होणार आहे. तर फिल्ड टेस्ट ही ऑफलाईन पद्धतीने २५ मार्च रोजी होणार आहे. एम.एड. ची परीक्षा २५ मार्च रोजी, बीएड (जनरल व स्पेशल) व बीएड (इएलसीटी) २७ मार्च ते २९ मार्चदरम्यान होणार आहे. एलएलबी (३ वर्ष) ही परीक्षा १ व २ एप्रिल रोजी होईल. बी.पी.एड. अभ्यासक्रमाची सीईटी ४ एप्रिल रोजी आणि फिल्ड टेस्ट ही ऑफलाईन पद्धतीने ५ ते ७ एप्रिलदरम्यान घेण्यात येणार आहे. बीएड-एम.एड. (३ वर्षीय एकात्मिक अभ्यासक्रम) ही परीक्षा ९ एप्रिल आणि एलएलबी (५ वर्ष) ८ मे रोजी होणार आहे.

सीईटीतील उच्च शिक्षण विभागाच्या या सात प्रवेश परीक्षेची प्रवेशपत्रे त्या त्या प्रवेश परीक्षेच्या काही दिवस आधी विद्यार्थ्यांच्या लॉगीनमध्ये ऑनलाईन उपलब्ध होतील. ज्या विद्यार्थ्यांनी प्रवेश परीक्षेसाठी अर्ज सादर केले आहेत, त्या विद्यार्थ्यांनी प्रवेश परीक्षेशी संबंधित अद्ययावत माहिती, प्रवेश पत्राची माहिती व सूचनांसाठी नियमितपणे राज्य सामाईक प्रवेश परीक्षा कक्षाच्या www.mahacet.org या अधिकृत संकेतस्थळाला वेळोवेळी भेट द्यावी असे आवाहन सीईटी कक्षाकडून करण्यात आले आहे.

राज्य सामाईक प्रवेश परीक्षा कक्षामार्फत विविध व्यावसायिक अभ्यासक्रमांच्या सीईटीला २४ मार्चपासून सुरुवात होत आहे. २४ मार्च ते १७ मे अशा ४५ दिवसांमध्ये सर्व १७ अभ्यासक्रमांच्या प्रवेश परीक्षा होणार आहेत. एमपीएड या अभ्यासक्रमाच्या प्रवेश परीक्षेपासून यावर्षीच्या सीईटीला सुरुवात होत आहे. आजपर्यंत १२ लाख ९४ हजार ४०९ विद्यार्थ्यांनी सीईटीसाठी नोंदणी केली आहे. यामध्ये दोन्ही संधी मिळून १७ लाख ४२ हजार ६० विद्यार्थी प्रवेश परीक्षा देणार आहेत.