मराठवाडा विद्यापीठाकडून जवळपास 3 लाख विद्यार्थ्यांना परीक्षा शुल्क माफी; दिवाळीतही कार्यालय सुरू
छत्रपती संभाजीनगर येथील डॉ. बाबासाहेब आंबेडकर मराठवाडा विद्यापीठाने पदवी व पदव्युत्तर अभ्यासक्रमांच्या परीक्षेसाठी बसलेल्या विद्यार्थ्यांना मोठा दिलासा दिला आहे. विद्यापीठ आणि संलग्न महाविद्यालयात शिक्षण घेत असलेल्या 2 लाख 96 हजार 114 विद्यार्थ्यांना परीक्षा शुल्क माफीचा लाभ मिळाला आहे.
Eduvarta
एज्युवार्ता न्यूज नेटवर्क
छत्रपती संभाजीनगर येथील डॉ. बाबासाहेब आंबेडकर मराठवाडा विद्यापीठाने पदवी व पदव्युत्तर अभ्यासक्रमांच्या परीक्षेसाठी बसलेल्या विद्यार्थ्यांना मोठा दिलासा दिला आहे. विद्यापीठ आणि संलग्न महाविद्यालयात शिक्षण घेत असलेल्या 2 लाख 96 हजार 114 विद्यार्थ्यांना परीक्षा शुल्क माफीचा लाभ मिळाला आहे. या निर्णयामुळे विद्यार्थी व त्यांच्या कुटुंबियांना आर्थिक भार कमी झाला आहे. परीक्षा व मूल्यमापन मंडळाचे संचालक डॉ. बी. एन. डोळे यांनी ही माहिती दिली. कुलगुरू डॉ. विजय फुलारी यांच्या मार्गदर्शनाखाली परीक्षा वेळापत्रक तयार करण्यात आले असून प्र-कुलगुरू डॉ. प्रवीण वक्ते यांच्या अध्यक्षतेखालील टास्क फोर्सनेही पारदर्शकतेसाठी विशेष प्रयत्न केले आहेत.
विद्यापीठाने शुल्क भरलेल्या एकूण 51 महाविद्यालयांतील 25,074 विद्यार्थ्यांचे शुल्क दिवाळी सुटीतही कार्यालय सुरू ठेवून परत केले आहे. या विद्यार्थ्यांनी एकूण 1 कोटी 88 लाख 33 हजार 761 रुपये जमा केले होते. त्यापैकी 34 महाविद्यालयांनी 1 कोटी 36 लाख 44 हजार 756 रुपयांचे धनादेश दिवाळी सुटीतच परत नेले. संबंधित महाविद्यालयांनी विद्यार्थ्यांना लगेच शुल्क परत करावे, असे डॉ. डोळे यांनी स्पष्ट केले आहे. दिवाळी सुटीच्या काळात 6 व 7 नोव्हेंबर रोजी परीक्षा विभागातील समन्वय विभाग सुरू ठेवण्यात आला होता.
या परीक्षांमध्ये बी.ए., बी.एस्सी., बी.कॉम. यासह एकूण 14 पदवी अभ्यासक्रमांचा समावेश आहे. दिवाळीपूर्वी व दिवाळीनंतर अशा दोन टप्प्यांत परीक्षा घेण्यात येत आहेत. पदवी परीक्षांचे पेपर 27 ऑक्टोबर ते 3 नोव्हेंबर दरम्यान झाले आहेत. सर्व व्यावसायिक व पदव्युत्तर अभ्यासक्रमांच्या परीक्षा 21 नोव्हेंबरपासून सुरू होणार आहेत. मूल्यांकन केंद्रे स्थापन करून परीक्षा प्रक्रिया सुरळीत व पारदर्शक ठेवण्यासाठी विभागाने विशेष नियोजन केले आहे.
विद्यापीठाच्या या उपक्रमामुळे विद्यार्थ्यांना आर्थिक मदत तर मिळालीच, शिवाय दिवाळी सुटीतही कार्यालय सुरू ठेवल्याने शुल्क परतफेड प्रक्रिया लवकर पूर्ण झाली. परीक्षा विभागाने कुलगुरू व प्र-कुलगुरूंच्या मार्गदर्शनाखाली सर्व तयारी पूर्ण केली असून विद्यार्थ्यांना कोणतीही अडचण येणार नाही, याबाबत आश्वासन दिले आहे. या निर्णयाचे विद्यार्थी व पालकांकडून स्वागत होत आहे.
