दहावी बोर्डाचा पेपर फुटला नाही, अफवांवर विश्वास ठेवू नका; शिक्षण मंडळाकडून स्पष्टीकरण 

एज्युवार्ता न्यूज नेटवर्क 

काल पुणे विभागीय कार्यालयातील अधीक्षक चंद्रकांत वैजनाथ जेवळीकर (Superintendent Chandrakant Jevalikar) यांनी दहावीच्या गणित भाग-१ आणि गणित भाग-२ या दोन प्रश्नपत्रिका (Two question papers leaked) एका टेलिग्रास ग्रुपवर प्रसारित केल्याप्रकरणी अज्ञात व्यक्तींवर शिवाजीनगर पोलीस ठाण्यात तक्रार दाखल केली. या प्रकरणी टेलिग्राम ग्रुपच्या अॅडमिनसह इतर सदस्यांविरुद्ध गुन्हा दाखल करण्यात आला. त्यानंतर आज त्याच पार्श्वभूमीवर राज्य मंडळाने (State Board of Education) प्रसिद्धिपत्रकाद्वारे स्पष्टीकरण (Explanation via press release) देत, प्रश्नपत्रिका फुटल्याच्या चर्चामध्ये तथ्य नसल्याचे स्पष्ट केले. त्यामुळे शिक्षण विभागामध्ये ताळमेळ नसल्याचे या प्रकरणावरून स्पष्ट झाले आहे.

राज्य मंडळाच्या दहावीच्या परीक्षेतील गणित भाग १ आणि गणित भाग २ या दोन विषयांची प्रश्नपत्रिका अज्ञाताने समाजमाध्यमात प्रसारित केल्याच्या घटनेबाबत राज्य मंडळाकडून स्पष्टीकरण देण्यात आले आहे. 'गणित भाग १ आणि गणित भाग-२ या विषयांची प्रश्नपत्रिका परीक्षा सुरू होण्यापुर्वी प्रसारित झाल्याची तक्रार अद्यापर्यंत प्राप्त झालेली नाही. प्रश्नपत्रिका उपलब्ध करून देण्याचे आमिष दाखवून आर्थिक फसणूक करण्याचा प्रकार असल्याचे सकृतदर्शनी दिसून येत असल्याचे राज्य मंडळाने स्पष्ट केले.

राज्य मंडळाने दिलेल्या माहितीनुसार, ९ मार्च रोजी राज्य मंडळाकडे समाजमाध्यमात गणित भाग एक, गणित भाग दोन या विषयांच्या प्रश्नपत्रिकाप्रसारित झाल्याची तक्रार प्राप्त झाली. या बाबत संबंधित दुव्यावर पडताळणी केली असता 'महाराष्ट्र स्टेट बोर्ड २०२६' या नावाच्या समूहावर ६ मार्च गणित भाग-१ ची प्रश्नपत्रिका आदल्या दिवशी प्रसारित झाल्याचे दाखविण्यात आले असले, तरी प्रत्यक्षात मात्र ही प्रश्नपत्रिका आदल्या दिवशी प्राप्त झाल्याचे दिसून येत नाही. पोलिस त्या बाबत तपास करत आहेत. 

संबंधित दुव्यावर ९ मार्च रोजी होणाऱ्या परीक्षेतील गणित भाग-२ ची प्रश्नपत्रिका उपलब्ध होईल, असा संदेश ६ मार्च रोजी सायंकाळी ४.५६ वाजता प्राप्त झाल्याचे दिसून आले. मात्र, ९ मार्च रोजी रोजी सायंकाळी ५.४७ वाजता पडताळणी केली असता समूहातील संशयिताकडून गणित भाग-२ प्रश्नपत्रिकेच्या पीडीएफखाली पासवर्ड नमूद केल्याचे दिसून आले. ती पीडीएफ उघडली असता गणित भाग-२ चा पेपर उपलब्ध असल्याचे दाखविण्यात आले. गणित भाग-२ ची प्रश्नपत्रिका त्या समूहावर त्या दिवशी गणिताची परीक्षा झाल्यानंतर उपलब्ध झाली, असे राज्य मंडळाने नमूद केले.

समाजमाध्यमातील काही ग्रुपवर गणित भाग-२ आणि विज्ञान भाग-१ या विषयांची परीक्षा सुरू होण्यापूर्वी प्रश्नपत्रिका उपलब्ध झाल्याचे दिसून येत नाही. गणित भाग २ ची प्रश्नपत्रिका ९ मार्च रोजी परीक्षा झाल्यानंतर समूहावर टाकण्यात आल्याचे दिसून आले. त्यामुळे राज्य मंडळाची कोणतीही प्रश्नपत्रिका परीक्षा सुरू होण्यापूर्वी समाजमाध्यमातील ग्रुपवर उपलब्ध झालेला नाही. मात्र, या प्रकरणात दहावी, बारावीच्या प्रश्नपत्रिका उपलब्ध करून देण्याचे आमिष दाखवून आर्थिक फसवणूक करण्याचा उद्देश सकृतदर्शनी दिसून येत आहे. त्यामुळे प्रश्नपत्रिका फुटल्याच्या चर्चामध्ये तथ्य नाही, असे राज्य मंडळाने स्पष्ट केले.