बोर्डाकडून 2027 च्या दहावी-बारावी परीक्षा वेळापत्रकात मोठा बदल; दहावीच्या वेळेत ४५ मिनिटांची सुधारणा
कौन्सिल फॉर द इंडियन स्कूल सर्टिफिकेट एक्झामिनेशन्स (CISCE) ने २०२७ मध्ये होणाऱ्या आयसीएसई (दहावी) आणि आयएससी (बारावी) परीक्षांचे वेळापत्रक जाहीर केले आहे. देशभरातून आणि परदेशातून एकूण सुमारे ३ लाख ७९ हजार ९८० विद्यार्थी या परीक्षांना बसणार आहेत.
Eduvarta
एज्युवार्ता न्यूज नेटवर्क
कौन्सिल फॉर द इंडियन स्कूल सर्टिफिकेट एक्झामिनेशन्स (CISCE) ने २०२७ मध्ये होणाऱ्या आयसीएसई (दहावी) आणि आयएससी (बारावी) परीक्षांचे वेळापत्रक जाहीर केले आहे. देशभरातून आणि परदेशातून एकूण सुमारे ३ लाख ७९ हजार ९८० विद्यार्थी या परीक्षांना बसणार आहेत. यावर्षी परीक्षा पद्धतीत आणि वेळेत काही महत्त्वाचे बदल करण्यात आले असून, विशेषतः दहावीच्या परीक्षेच्या वेळेत ४५ मिनिटांचा फरक केला गेला आहे. नवीन राष्ट्रीय शैक्षणिक धोरणाच्या अनुषंगाने विद्यार्थ्यांच्या पाठांतराऐवजी संकल्पनात्मक समज, चिकित्सक विचार आणि समस्या सोडवण्याच्या कौशल्यावर भर दिला जाणार आहे.
दहावीच्या परीक्षेसाठी विद्यार्थ्यांना सकाळी ९.४५ वाजेपर्यंत परीक्षा केंद्रावर पोहोचावे लागेल. सकाळी १० वाजता प्रश्नपत्रिका वाचण्यासाठी दिली जाईल आणि १०.१५ वाजता प्रत्यक्ष लेखनाला सुरुवात होईल. बोर्डाचे मुख्य कार्यकारी अधिकारी डॉ. जोसेफ इमॅन्युएल यांनी सांगितले की, या बदलांचा उद्देश विद्यार्थ्यांना एकविसाव्या शतकातील आव्हानांसाठी तयार करणे हा आहे. परीक्षा केवळ आठवणीच्या क्षमतेची न राहता विचारशक्ती आणि अनुप्रयोगक्षमतेची तपासणी करेल.
बारावीची परीक्षा ९ फेब्रुवारी ते ८ एप्रिल २०२७ या कालावधीत होईल. देशभरातील १६५१ शाळांमधून १ लाख १० हजार २६ विद्यार्थ्यांनी नोंदणी केली असून, ही परीक्षा १४७७ केंद्रांवर घेतली जाईल. दहावीची परीक्षा १५ फेब्रुवारी ते ३१ मार्च २०२७ दरम्यान पार पडेल. यासाठी ३१०६ शाळांमधून सुमारे २ लाख ७० हजार विद्यार्थी २८३५ केंद्रांवर ७६ विषयांची परीक्षा देतील.
महाराष्ट्रातून बारावीसाठी ४६६० आणि दहावीसाठी ३१३५ विद्यार्थ्यांनी नोंदणी केली आहे. त्यामुळे राज्यातील एकूण ३५६९५ विद्यार्थी या परीक्षा देतील. विषयानुसार सविस्तर माहितीसाठी विद्यार्थी आणि पालकांनी बोर्डाच्या अधिकृत संकेतस्थळावर (https://cisce.org/) भेट देऊन अद्ययावत माहिती तपासून घ्यावी.
