आयबीपीएस PO भरती २०२६: तब्बल ६ हजार ७१५ जागांसाठी अर्ज सुरू; परीक्षेत मोठा बदल
देशातील ११ प्रमुख सार्वजनिक क्षेत्रातील बँकांमध्ये ही भरती होणार आहे. बँक ऑफ बडोदा -१९०० पदे, कॅनरा बँक - १५००पदे, बँक ऑफ महाराष्ट्र -११०० पदे आणि पंजाब नॅशनल बँक - ५०४ पदे अशा एकूण ६ हजार ७१५ जागांसाठी ही भरती प्रक्रिया राबवली जाणार आहे.
eduvarta@gmail.com 
एज्युवार्ता न्यूज नेटवर्क
बँकिंग क्षेत्रात करिअर (Banking Career) करण्याची इच्छा असणाऱ्या हजारो तरुणांसाठी मोठी संधी उपलब्ध झाली आहे. इन्स्टिट्यूट ऑफ बँकिंग पर्सनल सिलेक्शनने (IBPS) प्रोबेशनरी ऑफिसर (Probationary Officer) आणि मॅनेजमेंट ट्रेनी (Management Trainee Post) पदांसाठी ६ हजार ७१५ जागांची भरती जाहीर (Recruitment announced for 6,715 posts) केली आहे. इच्छुक उमेदवार २१ जुलै २०२६ पर्यंत आयबीपीएसच्या अधिकृत वेबसाइटवर ऑनलाइन अर्ज करू शकतात.
देशातील ११ प्रमुख सार्वजनिक क्षेत्रातील बँकांमध्ये ही भरती होणार आहे. बँक ऑफ बडोदा -१९०० पदे, कॅनरा बँक - १५००पदे, बँक ऑफ महाराष्ट्र -११०० पदे आणि पंजाब नॅशनल बँक - ५०४ पदे अशा एकूण ६ हजार ७१५ जागांसाठी ही भरती प्रक्रिया राबवली जाणार आहे. उमेदवारांकडे कोणत्याही मान्यताप्राप्त विद्यापीठाची पदवी असणे आवश्यक आहे. १ जुलै २०२६ रोजी उमेदवाराचे वय किमान २० वर्षे आणि कमाल ३० वर्षे असावे. अनुसूचित जाती, जमाती, ओबीसी आणि दिव्यांग उमेदवारांना वयोमर्यादेत सवलत मिळणार आहे.
अर्ज शुल्काबाबत, SC/ST आणि दिव्यांग उमेदवारांना १७५ रुपये तर सामान्य, ओबीसी आणि EWS प्रवर्गातील उमेदवारांना ८५० रुपये शुल्क भरावे लागेल. भरती प्रक्रियेत प्रीलिम्स परीक्षा ऑगस्ट २०२६ मध्ये आणि मुख्य परीक्षा ऑक्टोबर २०२६ मध्ये घेण्यात येणार आहे. यशस्वी उमेदवारांना मुलाखत आणि दस्तऐवज तपासणीनंतर नियुक्ती दिली जाईल.
यंदा मुख्य परीक्षेत महत्वाचा बदल करण्यात आला आहे. गेल्या वर्षी १४५ वस्तुनिष्ठ प्रश्न होते, ते यंदा १७० करण्यात आले आहेत. मात्र एकूण गुण २०० आणि वेळ १६० मिनिटे यात कोणताही बदल नाही. डिस्क्रिप्टिव्ह पेपर (निबंध आणि आकलन) यातही बदल झालेला नाही. हा बदल परीक्षेची कठीणता वाढवणारा ठरू शकतो. अधिक माहितीसाठी IBPS च्या अधिकृत संकेतस्थळाला भेट द्या, असे आवाहन करण्यात आले आहे.
