धक्कादायक: अभ्यास मंडळ अध्यक्ष प्राध्यापक पदासाठी अपात्र; SPPU विद्यापीठाची भरती प्रक्रिया वादाच्या भोवऱ्यात?
विद्यापीठाच्या एका विषयाच्या अभ्यास मंडळाच्या सदस्याचा अर्ज अपात्र ठरवण्यात आला आहे.मात्र,या पूर्वी याच उमेदवाराने विद्यापीठाच्या अधिष्ठाता पदासाठी अर्ज केला होता.त्यावेळी तो अधिष्ठाता पदाच्या मुलाखतीसाठी पात्र ठरला होता.मात्र, सध्या विद्यापीठाच्या अभ्यास मंडळाचा अध्यक्ष असताना हा उमेदवार विभागातील प्राध्यापक पदासाठी अपात्र ठरला आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या एका अभ्यास मंडळाचे विद्यमान अध्यक्ष आणि यापूर्वी थेट अधिष्ठाता पदाच्या मुलाखतीसाठी पात्र ठरलेले प्राध्यापक आता विद्यापीठातर्फे राबवल्या जात असलेल्या 111 पदांच्या भरतीमध्ये अपात्र ठरले आहेत. त्यामुळे भरती प्रक्रिया राबवली जात असताना कागद पत्रांची स्कृटीनी (छाननी) योग्य पद्धतीने होते किंवा नाही, याबाबत शंका उपस्थित केली जात आहे.विद्यापीठाकडून अशा पद्धतीने पात्र उमेदवारांना मुलाखतीपूर्वीच डावलले जात असेल तर ही भरती प्रक्रिया वादाच्या भोवऱ्यात सापडेल,अशी भीती अर्ज केलेल्या उमेदवारांकडून व्यक्त केली जात आहे.
सावित्रीबाई फुले पुणे विद्यापीठातर्फे विविध विभागांमधील प्राध्यापकांच्या रिक्त पदांसाठीची भरती प्रक्रिया राबवली जात आहे. त्यासाठी वेळोवेळी राज्याच्या उच्च शिक्षण विभागातर्फे प्रसिद्ध करण्यात आलेल्या अध्यादेशानुसार उमेदवारांकडून अर्ज मागविण्यात आले. उमेदवारांनी दिलेल्या मुदतीत आवश्यक कागदपत्र सादर करणे बंधनकारक होते. विद्यापीठाने अर्ज सादर करण्यासाठी अनेक वेळा मुदत वाढही दिली होती. शासन निर्णयानुसार उमेदवारांकडून एटीआर सह अर्ज मागविण्यात आला. उमेदवारांनी अर्ज सादर केल्यानंतर सर्व अर्जांची छाननी करण्यात आली.
विद्यापीठाच्या विविध विभागांमध्ये प्राध्यापक पदाच्या जागेसाठी अर्ज केलेल्या अनेक उमेदवारांचे अर्ज पात्र व अपात्र, असे यादीसह जाहीर करण्यात आले.त्यात काही उमेदवारांनी योग्य पध्दतीने अर्ज जमा केला नाही. आवश्यक कागदपत्र विहित मुदतीत जमा केले नाहीत. काही उमेदवारांनी सेल्फ अटेस्टेड कागदपत्र सादर केले नाही, या कारणांसह संबंधित उमेदवारांचे अर्ज अपात्र ठरवले आहे.मात्र, अर्ज सादर करताना ऑनलाईन व ऑफलाईन सर्व कागदपत्र जमा केले होते, तरीही आम्हाला अपात्र ठरवण्यात आले आहे,असा दावा उमेदवारांकडून करण्यात आला आहे.
विद्यापीठाच्या एका विषयाच्या अभ्यास मंडळाच्या सदस्याचा अर्ज अपात्र ठरवण्यात आला आहे.मात्र,या पूर्वी याच उमेदवाराने विद्यापीठाच्या अधिष्ठाता पदासाठी अर्ज केला होता.त्यावेळी तो अधिष्ठाता पदाच्या मुलाखतीसाठी पात्र ठरला होता.मात्र, सध्या विद्यापीठाच्या अभ्यास मंडळाचा अध्यक्ष असताना हा उमेदवार विभागातील प्राध्यापक पदासाठी अपात्र ठरला आहे.त्यामुळे विद्यापीठाने कागदपत्रांची छाननी योग्य पध्दतीने केली आहे किंवा नाही? याबाबत संबंधित उमेदवारांकडून शंका घेतली जात आहे.तसेच विद्यापीठाकडे ऑनलाईन ऑब्जेक्शन समबमीट केले आहे.त्यामुळे संबंधित उमेदवार विद्यापीठातील प्राध्यापक पदाच्या भारतीसाठी पात्र ठरणार की अपात्र हे पाहणे उत्सुकतेचे ठरणार आहे.
विद्यापीठातील 111 पदे अनेक वर्षांपासून रिक्त आहेत. ही पदे भरली जाणे अत्यंत गरजेचे आहे.मात्र, पात्र उमेदवार अपात्र ठरवले तर यावर उमेदवार न्यायालयात जाऊन दाद मागण्याची शक्यता नाकारता येत नाही. अनेक अनुभवी उमेदवार विद्यापीठाने प्रसिध्द केलेल्या अपात्र उमेदवारांच्या यादीत आहे.त्यामुळे विद्यापीठाच्या कार्यपद्धतीवर शंका उपस्थित केली जात आहे.
__________________________
विद्यापीठातर्फे अत्यंत पारदर्शक पद्धतीने भरती प्रक्रिया राबवली जात आहे. विद्यापीठातर्फे शासन निर्णयाप्रमाणे प्रसिध्द केलेल्या जाहिरातीनुसार विहित मुदतीत प्राप्त झालेले सर्व अर्ज तपासण्यात आले. अर्ज करणारे अनेक उमेदवार अनुभवी आहेत. मात्र, संबंधित उमेदवारांनी विहित मुदतीत अर्जाबरोबर पात्रतेच्या इतर अटींची पूर्तता करण्यासाठी नियमानुसार आवश्यक कागदपत्र जोडणे बंधनकारक आहे. कागदपत्र तपासूनच पात्र व अपात्र उमेदवारांची यादी विद्यापीठाने जाहीर केली आहे.
- डॉ. प्रफुल्ल पवार, प्रभारी कुलसचिव, सावित्रीबाई फुले पुणे विद्यापीठ, पुणे
