मुंबई विद्यापीठ पेपर फुटीची CID चौकशी; सरगर कोण?त्याचीही चौकशी करा :चंद्रकांत पाटील
विद्यापीठ हे स्वायत्त आहे. राज्य शासनाकडून यासंदर्भात सीआयडी चौकशी करण्याची घोषणा करता येणार नाही. मात्र, विद्यापीठाच्या व्यवस्थापन परिषदेमध्ये सीआयडी चौकशी करण्यासंदर्भात आवश्यक सूचना राज्य शासनातर्फे दिल्या जातील.
eduvarta@gmail.com 
एज्युवार्ता न्यूज नेटवर्क
मुंबई विद्यापीठाच्या टीवायबीकॉम तृतीय वर्षाच्या प्रश्नपत्रिका फुटी प्रकरणी पावसाळी अधिवेशनात विधान परिषदेमध्ये जोरदार चर्चा झाली. या प्रकरणाची चौकशी सीआयडीकडे देण्याची मागणी करण्यात आली. त्यावर विद्यापीठ हे स्वायत्त असल्याने पेपर फुटी प्रकरणाची चौकशी सीआयडीकडे देण्याच्या सूचना शासनाकडून विद्यापीठाला कळविल्या जातील, विद्यापीठाच्या व्यवस्थापन परिषदेमध्ये यावर निर्णय घेतला जाईल, असे राज्याचे उच्च व तंत्र शिक्षण मंत्री चंद्रकांत पाटील यांनी विधान परिषदेमध्ये स्पष्ट केले.
नीट पेपर फुटीप्रमाणे मुंबई विद्यापीठाच्या पेपर फुटी मागे संघटित रॅकेट असण्याची शक्यता विधान परिषद सदस्यांकडून व्यक्त करण्यात आली. मुंबई विद्यापीठाच्या एप्रिल 2026 मध्ये झालेल्या टी वाय बी कॉम सत्र क्रमांक सहा परीक्षेतील प्रश्नपत्रिका कुठल्याचे समोर आले. अर्थशास्त्र आणि डायरेक्ट अँड इनडायरेक्ट टॅक्सेस या दोन विषयाच्या प्रश्नपत्रिका परीक्षा सुरू होण्यापूर्वीच सोशल मीडियावर उपलब्ध झाल्याचे आरोप यावेळी करण्यात आले.त्यावर या संदर्भात सखोल चौकशी करण्याची मागणी आमदार भाई जगताप, आमदार अनिल परब यांनी केली. त्यावर चंद्रकांत पाटील यांनी सभागृहात उत्तर दिले.
बांद्रा येथील आरडी नॅशनल कॉलेज येथे विद्यापीठाच्या भरारी पथकाने केलेल्या तपासणीत सहा विद्यार्थी मोबाईलसह आढळून आले चौकशीयंती प्रश्नपत्रिका फुटल्याचे समोर आले. काही खाजगी क्लासेसच्या व्हाट्सअप ग्रुप वर संबंधित प्रश्नपत्रिका आणि त्याची उत्तरे परीक्षा सुरू होण्यापूर्वीच प्रसारित करण्यात आल्याची माहिती निदर्शनास आली. त्यावर विद्यापीठाने संबंधित विद्यार्थ्यांवर कारवाई केली आहे. मात्र, या प्रकरणात पेपर सेटर व विद्यापीठातील अधिकारी यांचा सहभाग आहे का ? याबाबत चौकशी करावी,अशी मागणी आमदारांनी केली. तसेच सरगर या व्यक्तीची सुध्दा चौकशी करण्यात यावी, अशी मागणी यावेळी उचलून धरली. त्यावर संबंधित व्यक्तीच्या नावाचा उल्लेख करून CID चौकशीबाबत सूचना दिल्या जातील,असे स्पष्ट करण्यात आले.
चंद्रकांत पाटील म्हणाले,विद्यापीठ हे स्वायत्त आहे. राज्य शासनाकडून यासंदर्भात सीआयडी चौकशी करण्याची घोषणा करता येणार नाही. मात्र, विद्यापीठाच्या व्यवस्थापन परिषदेमध्ये सीआयडी चौकशी करण्यासंदर्भात आवश्यक सूचना राज्य शासनातर्फे दिल्या जातील. कुलगुरू सध्या दालनात उपस्थित असून त्यानुसार पुढील कारवाई केली जाईल.
